Mançini: Itali, mjaftohem me 3 pikët në Armeni
"Fizikisht janë përpara nesh, dua një ndeshje të zgjuar"
Stafeta e Italisë drejt "Euro 2020" do të rin isë nga transferta në Armeni, pasi e kanë nisur Grupin J me katër fitore në katër ndeshjet e para. Në Jerevan, në stadiumin "Vzgen Sargsyan", të kaltrit e Roberto Mançinit do të kërkojnë që të bëjnë një tjetër hap të madh jo vetëm drejt kualifikimit sa më të shpejtë, por edhe drejt përmirësimit të një grupi futbollistësh, i cili është mbuluar me elozhe për paraqitjet e bëra deri më dje ndaj Finlandës, Lihtenshteinit, Greqisë dhe Bosnjë Hercegovinës. Gjithsesi, trajneri i "axurrëve", edhe pse urdhëroi tri pikët e radhës, kërkon në të njëjtën kohë kujdes, ndërsa të dielën i pret një tjetër transfertë në Finlandë.
KUJDES MAKSIMAL
"Dua të shoh një Itali të zgjuar në fushë, në një ndeshje që do të jetë shumë e vështirë për ne, - bën hyrjen e tij trajneri Mançini. - E them këtë, sepse pjesa më e madhe e futbollistëve të Armenisë është përpara nesh për sa i përket përgatitjes fizike, duke qenë se jo vetëm kampionati vendës, por edhe ata që luajnë jashtë Armenisë, kanë më shumë 'benzinë' në këmbët e tyre, sepse janë stërvitur minimalisht dy javë më shumë sesa futbollistët e mi. Sigurisht që ky nuk është një justifikim, por dua të shoh në fushë një skuadër që të dijë të menaxhojë resurset fizike dhe psikologjike, në mënyrë që të shmangim edhe pengesa të tjera që mund të lidhen me problemet fizike. Kemi ardhur që të marrim tri pikët e radhës, pa mendjemadhësi; përkundrazi me shumë, po shumë respekt për këtë kundërshtar, por në të njëjtën kohë do të isha tepër i lumtur sikur ta mbyllnim sa më shpejt që të ishte e mundur kualifikimin tonë për në 'Euro 2020'. Fatkeqësisht, për këtë takim më duhet të bëj edhe disa zgjedhje të forcuara, të cilat më prishën jo pak plane që kisha bërë në kokë".
DËMTIMET
- Lidhur me formacionin që pritet të hedhë në fushë, Roberto Mançini nuk jep indicie mbi emra konkretë, por konfirmon se 10 nga 11 titullarët i ka zgjedhur pas stërvitjeve të para. "Siç e thashë edhe më parë, më vjen shumë keq për disa mungesa të rëndësishme. Do të kisha dashur shumë që të ishin shmangur problemet që pati Kielini apo edhe Insinje. Janë
dy ndër pikat tona më të forta, por i tillë është futbolli, ndonëse kam kontingjentin e duhur që t'i mbulojmë ato dhe të bëjmë një ndeshje të madhe. Unë dua që ta nisim aty nga e lamë, nga një fitore e vështirë kundër Bosnjës, por në fund i merituam tri pikët
dhe dua që të kthehemi nga Armenia me të njëjtin rezultat. Në kokën time e kam kompletuar formacionin. Më saktë, kam zgjedhur 10 nga 11 titullarët që do të luajnë nga minuta e parë. Këto zgjedhje i kam bërë duke ditur, pranuar dhe ritheksuar se nuk jemi
ende në formën maksimale, prandaj nuk dua të shoh çmendurira në fushë, dua thjesht saktësi dhe kthjelltësi në lojë", vazhdon 54-vjeçari.
ARMENIA - Lidhur me cilësitë e kundërshtarit, Roberto Mançini nuk harron që të fusë në mes edhe historinë: "E thashë, armenët janë përpara nesh në aspektin fizik, por në të njëjtën kohë mos harrojmë se në këtë transfertë, Italia ka vuajtur thuajse gjithmonë, sidomos në vitet e fundit. E ndoqa Armeninë në ndeshjen e fundit që bëri ndaj Greqisë. Më lanë një përshtypje shumë të mirë, kompliment që për ne përkthehet në shqetësim, prandaj dua kujdes maksimal nga ana e lojtarëve të mi. Janë pikë të rëndësishme në lojë ndaj Armenisë, por edhe ndaj Finlandës dhe do të isha tepër i lumtur sikur t'i merrnim të plota ato deri të dielën", përfundoi konferencën për shtyp trajneri i Italisë.