Italia me marsh të pestë, fiton edhe Spanja
5 fitore radhazi, të kaltrit me pikë të plota në grup
Asfaltohet edhe Ar menia! Ndoshta nuk ishte aq e lehtë sa ç’ishte menduar, por Roberto Mançini pati paralajmëruar. Dje nuk u pa Italia e katër ndeshjeve të mëparshme, e cila dhuroi spektakël, por e rëndësishme është që në fund, të kaltrit kthehen nga Jerevani me fitoren e pestë radhazi në këto eliminatore dhe vazhdojnë të udhëheqin Grupin J me pikë të plota (15). Nëse në fillim të zotët e shtëpisë trembën jo pak italianët, me një gol në kundërsulm të Karapetjanit, i cili bën engjëllin dhe djallin për kombëtaren e tij (gol dhe karton i kuq në pjesën e parë), Beloti fillimisht barazon në të 28-ën, ndërsa Lorenco Pelegrini dhe një autogol i portierit armen vulosin shifrat në 3-1 për “axurrët”. Tani pjesëmarrja në “Euro 2020” duket e futur në kasafortë për skuadrën e Roberto Mançinit.
NISJE SHOKUESE - Duket që Italia është me vonesë në përgatitjen fizike, ndërsa armenët fluturojnë, sidomos kur nisen në kundërsulm dhe kur futen në driblim, është e pamundur t’i frenosh. Dhe, të gjitha këto cilësi arrijnë t’i shfrytëzojnë me një aksion model në minutën e 11-të: Barela, ndër më të dobëtit në fushë, humb një top në sulm dhe bashkuar me fajësinë e Kiezës që nuk i bën presing rivalit, Barseghian niset si një “silurë” në të djathtë dhe i dhuron një asist Karapetjanit, i cili nuk i lë shpëtim Donarumës me diagonalen e tij perfekte. Kjo nuk është Italia e Mançinit e parë në katër ndeshjet e para dhe ata që e tradhtuan ishin pikërisht lojtarët që i dhuruan komplimentet, Barela, Kieza dhe Bernardeski, të paktën derisa ky i fundit nuk spostohet në krahun e djathtë, pasi ylli i Fiorentinës nuk thirret në stol.
ZGJOHET ITALIA - Për fatin e mirë të Italisë, avantazhi “deh” armenët, pasi lideri i skuadrës, Gazarjan, vendos që ta ulë ritmin dhe kaq mjafton që Italia të rikuperojë forcat, por të korrigjojë edhe manovrën, aq sa në sulmin e parë të vërtetë, Emerson nga e majta driblon këdo që i del përpara dhe i ofron Belotit një krosim, të cilin e devijon lehtësisht në rrjetë për barazimin 1-1. Armenia tërbohet. Karapetjan, bomberi i skuadrës, vendos që të marrë edhe të verdhin e dytë përpara pushimit dhe i bën një dhuratë të madhe Italisë.
PËRMBYSJA – Në pjesën e dytë Italia është e detyruar të sulmojë. Mançini e sheh që, edhe pse në superioritet numerik,
diçka në sulm mungon dhe aty bën lëvizjen e duhur. Në fushë Lorenco Pelegrini për Barelën dhe vjen avantazhi: Bonuçi kroson nga e djathta dhe talenti i Romës godet saktë me kokë, duke ofruar 2-1. Kaq mjafton që të zotët e shtëpisë të dorëzohen dhe në të
80-ën, tri minuta pas disavantazhit, shohin goditjen e Belotit që të stampohet në shtyllë, por portieri Hajrapetjan është i pafat, pasi topi i përplaset në shpinë dhe devijohet brenda vijës fatale. 3-1 për Italinë, e cila merr trepikëshin e radhës, ndonëse duke vuajtur shumë.