Tension dhe gola në Cërrik, triumfon Turbina
Cërrikasit kanë fituar thellë ndaj Sopotit, 4-1, në një ndeshje të mbushur me episode. Shpesh tifozët kanë duartrokitur, kanë bërtitur, por edhe qeshur, teksa në fillim të pjesës dytë kryesori Dyrmyshi la fushën i dëmtuar. Ndeshja është ndërprerë në disa momente për shkak të nervozizmit të futbollistëve të të dyja skuadrave. Cërrikasit kanë dominuar, siç tregon dhe rezultati. Kapiteni
Roshi hapi serinë e golave në minutën e 31-të, kur Levendi fitoi një
11-metërsh pas pengimit nga Bella.
Miqtë u vunë në lëvize dhe pas një rrëmuje në zonë barazuan me Gocin. Portieri i talentuar cërrikas,
Laroshi, tregoi aftësitë e tij përballë
Çotës dhe Polisit. Pa mbaruar pjesa e parë u ndërpre disa minuta loja për shkak të nervozizmit të lojtarëve.
Në pjesën e dytë Turbina shënoi 3 gola të tjerë me brazilianët Romulo dhe Dudu, dhe Levendin. Për Sopotin u dalluan Polisi dhe Seferi. Turbina shënon kështu fitoren e parë në miqësore dhe e bën përballë “maces së zezë”, Sopotit. Pas ndeshjes, trajneri Lubani tha: “Ekipi i kishte këmbët e rënda, që tregon se kemi bërë një punë të mirë në këtë fazë përgatitore. Lojtarët ishin akademikë në lojën e tyre dhe kjo nuk më pëlqeu në pjesën e parë. Ishin më të përgjegjshëm se duhet, kjo ka të keqen e saj. Dhjetë minutat e para të pjesës së dytë ishin shembulli i asaj që dua nga këta djem”. Kurse trajneri i Sopotit, Kënga, u shpreh: “Ishte një ndeshje me tension. Lojtarët e të dyja skuadrave pothuaj ishin të shpërqendruar dhe nuk i kushtuan seriozitet futbollit. Kishte nervozizëm dhe ndërprerje loje. Nuk di ç’të them më tepër. Kemi nevojë për të tjera përforcime”. Artan Paja