Shkriniar-Godin-De Vraj, “mbrojtja e çeliktë” nis provat

Ka qenë pika e referimit e skuadrës së Antonio Kontes. Megjithatë, nuk është parë, për momentin... Bëhet fjalë për trion mbrojtëse që sipas ekspertëve të futbollit do të marrë trashëgiminë e “BBC”-së juventine. Godin, De Vraj dhe Shkrinjar janë një asortiment qendërmbrojtësish, të cilët mund të konkurrojë me të drejtë me repartet më të mira të botës. Aktivizimi i “GDS”-së, megjithatë, është shtyrë. Fillimisht për shkak të dëmtimit të Godinit e më pas të De Vrajit janë prishur provat gjenerale në miqësore dhe në dy javët e para të kampionatit dhe vetë Shkrinjar ka kaluar një fazë përgatitore të ndërlikuar, mes ngarkesave të punës nga pikëpamja atletike dhe nevojës për t’u përshtatur me një modul në të cilin ka luajtur shumë pak herë.

– Në dy ndeshjet e para të Serisë A, megjithatë, Interi ka pësuar vetëm një gol, ai i Zhoao Pedros në Kaljari, ku gabimet e prapavijës kanë qenë të shumta. U pësua me aktivizimin e një tresheje alternative, me Danilo D’Ambrozion në të djathtë, Shkrinjarin në të majtë dhe Andrea Ranokian në qendër. Ky i fundit në vetëm dy ndeshje ka grumbulluar më shumë se trefishin e minutave të luajtura në kampionatin e kaluar, kur u ndal në 58’ në kampionat dhe 296’ në total. Mekanizmat e skuadrës dhe të reparteve në tërësi tashmë duken të asimiluara, mbetet vetëm të priten teste më angazhuese dhe shtimi i cilësisë së “Sherifit” dhe holandezit. Godin debutoi në fund kundër Kaljarit, De Vraj nuk u nis me kombëtaren “portokalli” për t’u riaftësuar nga problemi muskulor që e ka mbajtur jashtë dy javëve të para të kampionatit. Ndeshja kundër Udinezes mund të jetë e para ku trioja do të shihet së bashku në fushë, edhe pse objektivi i vërtetë është starti i Ligës së Kampioneve më 17 shtator dhe derbi i datës 22.