Topin e ka Reja, historia bëhet me “gjelat”
Nga Brigel te De Biazi, e kanë dhënë një shkëndijë
T'i kërkosh sot Shqipërisë të marrë pikë kundër Francës mund të duket e tepruar. Jo vetëm sepse jemi në një periudhë tranzicioni dhe Reja është trajneri i dytë brenda këtij edicioni, por sepse po luajmë kundër kampionëve të botës. Në shtëpinë e tyre... Më e vështirë se kaq nuk mund të bëhej, as për Kombëtaren tonë dhe as për trajnerin. Por ja që për dreq, Shqipërisë i duhet shumë një rezultat pozitiv kundër "gjelave". I duhet edhe Rejas për kontratën e së ardhmes, por mbi të gjitha Shqipërisë. Ka shumë të ngjarë të mos shkojmë në Europian edhe nëse e mundim Francën sot, por na duhet patjetër një shkëndijë. Kemi shumë nevojë për atë shkëndijë që do të kthente besimin në skuadër dhe mbi të gjitha do të krijonte atmosferën e duhur. Atmosferë që mungon te shqiptarët që prej kualifikimit në Europian. Sepse kështu ka funksionuar sistematikisht dekadat e fundit me kuqezinjtë: një ndeshje e madhe me një rezultat pozitiv ka ndezur gjithë shqiptarinë.
- Të gjithë e kujtojnë se çfarë ndodhi kur Brigel ishte trajner dhe Shqipëria mundi Rusinë 3-1 në "Loro Boriçi" (29 mars 2003). Fitorja me Greqinë 21 më 4 shtator 2004, ishte gjithashtu një shkëndijë që ndezi shpresa për të ardhmen. - Me Oto Bariçin mjaftoi një barazim 0-0 në transfertë kundër Bullgarisë (28 mars 2007) dhe skuadra u transformua për muaj të tërë.
- Ari Han mbijetoi më gjatë se sa duhej në stolin kuqezi, pikërisht se mori një barazim 0-0 me dhjetë futbollistë në Portugali (15 tetor 2008). Ronaldo ishte në fushë...
- Nën drejtimin e të ndjerit Josip Kuzhe kuqezinjtë bënë një nga ndeshjet më të mira në histori kur mundën Bjellorusinë 1-0 në Tiranë (26 mars 2011). - Shqipëria e De Biazit shkëndijën e parë e dha me atë fitore 10 në Norvegji (22 mars 2013). Ndërsa udhëtimi historik drejt "Euro 2016" nisi pikërisht me një fitore 1-0 në Portugali (7 shtator 2014). Ronaldo me shokë atë edicion u shpallën kampionë Europe. I vetmi që nuk dha asnjë shkëndijë ishte Panuçi dhe u shkarkua pa luajtur as gjysmat e ndeshjeve. Tani është radha e Rejas, topi është në duart e tij. Franca nuk është një "klient" komod, por është i duhuri për të bërë historinë. Nëse ia del sot, nuk shton vetëm shanset për të rinovuar kontratën që i skadon në nëntor, por kthen besimin te e gjithë tifozëria kuqezi.