U vendos himni i Andorrës, ja skandali para ndeshjes
Zyrtari i FSHF-së: Arbitri kërkoi ta niste direkt lojën
Ndeshja mes Francës dhe Shqipërisë startoi me vonesë, për shkak të incidentit që ndodhi me himnin tonë kombëtar. Në momentin e fillimit të ndeshjes, në stadium u luajt himni i Andorrës dhe jo i Shqipërisë. Mirëpo, në këtë moment, skuadra jonë përfaqësuese, me anë të stafit dhe vetë futbollistëve, ka kërkuar që të mos fillojë ndeshja pa u ekzekutuar himni ynë. Mirëpo, si të mos mjaftonte vetëm gabimi me ekzekutimin e himnit, edhe ndjesa e kërkuar nga spikeri i stadiumit ka qenë gjithashtu një gafë. Në ato momente,
spikeri i stadiumit po kërkonte ndjesë për incidentin, teksa u bënte thirrje edhe tifozëve të ngriheshin për të respektuar himnin e Shqipërisë, por në vend të “Albanie”, spikeri tha fjalën “Armenie”, pra të Armenisë, duke ngatërruar kështu
edhe emrin e Shqipërisë.
Edhe në transmetimet televizive u pa qartë që njëri prej anëtarëve të stafit të Kombëtares, më tej në prani edhe të Hamdi Salihit, ka komunikuar me arbitrin dhe më pas edhe me delegatin e ndeshjes. Ai është Erand Ibrahimi, një prej zyrtarëve që ka përfaqësuar Shqipërinë në atë moment dhe ekskluzivisht për “Panorama Sport” ka sqaruar çfarë ndodhi. Anëtari i stafit ka treguar bisedën me arbitrin e takimit dhe kërkesën e spanjollit për të vijuar ndeshjen, duke dhënë justifikimin për çfarë ndodhi. “U vu himni i Andorrës dhe më pyetën: ‘A mund ta fillojmë ndeshjen sepse ishte vetëm një gabim teknik?’ Mirëpo u jam përgjigjur në mënyrë kategorike: ‘Absolutisht që jo!’ Madje, jo vetëm kaq, por kam kërkuar edhe që të kërkohet falje publike në atë moment, pasi të vendoset himni ynë për atë gabim teknik që bënë. Isha shumë i qartë dhe i prerë në atë që kam kërkuar në atë moment. Më pas, edhe vetë zyrtarët e federatës franceze e pranuan se ishte një gabim, i cili u ndodhte për herë të parë. Megjithatë, për fat, u zgjidh shpejt”, shpjegoi zyrtari i federatës, Erand Ibrahimi, për “Panorama Sport” në lidhje me incidentin në fillim të takimit për mosekzekutimin e himnit tonë kombëtar në start, por i ngatërruar me atë të Andorrës.