Mavraj: Mos e bëni dramë, na mungoi guximi
"Ata ishin shumë të fortë me topin në zotërim, mbrojtja..."
Është e kuptueshme që Shqipëria të vua jë ndaj Francës, por shumë nuk pajtohen me çfarë ndodhi në momentet e pësimit të golave. Gabime, mungesë përqendrimi dhe në total një paraqitje larg ideales që vetë përfaqësuesja na ka mësuar të tregojë, sidomos ndaj ekipeve të mëdha. Mirëpo, Mërgim Mavraj bën kapitenin. Po, i tillë del para mediave dhe nuk fshihet, por mbi të gjitha e mbron skuadrën.
MBROJTJA - Kapiteni ishte ndër të parët që e pranoi ballafaqimin me median. "Vështirë që të analizosh ndeshjen direkt pasi përfundoi. Edhe në pjesën e parë kemi pasur disa situata dhe kemi pasur mundësi që ta qarkullonim më mirë topin. Ata na kanë lënë disi hapësira, nuk na bënë aq shumë presion përveç dy sulmuesve dhe duhet të kishim mundësi që të luanim. Besoj se golat e parë ishin gabime të thjeshta. Nuk ju jap të drejtë kur thoni që ishte kaq shumë zhgënjyese dhe nuk e di pse duhet ta lexojmë këtë ndeshje në mënyrë kaq radikale... E dimë të gjithë cila është Franca. Nuk është niveli ynë", tha Mavraj për "SuperSport". I pyetur për ndryshimet e dy kombëtareve nga periudha e Europianit deri tani, nëse ishte Franca më e fortë apo Shqipëria më e dobët, ai vijon: "Jeni shumë radikalë, nuk e di pse? Besoj se të gjithë faktorët luajnë rol. Franca nuk është siç ishte, apo edhe ne kemi skemë tjetër, kemi disa lojtarë të rinj, por edhe faktin që atëherë Franca nuk e ka njohur shumë mirë Shqipërinë, ndërsa tani e njeh shumë mirë dhe e ka përgatitur më mirë. Nuk është situata për të kërkuar fajtorin, pasi ka shumë gjëra që kanë rolin e tyre për të humbur 4-1 në Francë".