Sarris mbërrin në Vlorë, Bationo nuk duket gjëkundi
Flamurtari/ Me ardhjen e grekut forcohet qendra e mbrojtjes
Georgios Sarris mbërrin në Vlorë. Mbrojtësi grek që ishte edhe goditja e fundit dhe në limitet e merkatos nga vlonjatët, është tashmë në dispozicion të trajnerit Dritan Sadedini. Sarris është një përforcim shumë i rëndësishëm për Flamurtarin, duke qenë se në këto ndeshje të para të realizuara të kampionatit ka shfaqur probleme me mbrojtjen. Greku është 30 vjeç dhe ka luajtur më parë për skuadra si AEKu, Ergotelis, Kajseri Ercijespor, Hamilton Akademikal, si dhe Petrolul në Rumani. Me ardhjen në Vlorë të Georgios Sarrisit, zgjidhet një pikë kyçe në qendrën e mbrojtjes dhe trajneri Sadedini do të ketë një alternativë më shumë. Sarris është tashmë i gatshëm për t'iu bashkuar ekipit dhe të vendoset shumë shpejt nën urdhrat e stafit teknik.
MESFUSHORI - Ives Bationo, lojtari nga Bregu i Fildishtë, por i rritur te Parma në Itali, nuk ka mbërritur ende në Vlorë. Burime pranë klubit bëjnë me dije për "Panorama Sport" se lojtarit i kanë dalë probleme me dokumentacionin, pikërisht me lejen e qëndrimit në Itali. Bationo mbërriti në Vlorë, ku u prezantua edhe nga klubi, më 24 gusht, por i është dashur që të largohet sërish drejt Italisë për të zgjidhur çështjen e letrave. "Tuttomercatoweb" shkruante para disa ditësh se që nga prilli i 2016-ës lojtari nuk ka luajtur asnjë minutë. Vetëm një ditë para se ai të prezantohej në Vlorë, Hellas Verona ka depozituar kontratën e mesfushorit te "Lega Serie A" dhe i njëjti lojtar është prezantuar edhe te Flamurtari, që do të thotë se ka ardhur në huazim nga klubi italian. I rritur në radhët e Parmës, 25-vjeçari ka luajtur me Burkina Fason dhe pse ka lindur në Bregun e Fildishtë. Megjithatë, Bationo nuk luan një ndeshje zyrtare prej më shumë se 3 vitesh. E ndërsa lojtarit i kanë dalë probleme me dokumentacionin, gjasat janë që Bationo të mos mbërrijë më në Vlorë dhe duke qenë se prej kohësh ai nuk ka luajtur, kjo mund të bëhet edhe një mundësi e mirë për Flamurtarin për të mos e marrë. Por, edhe nëse do të mbërrijë, me shumë gjasa që pjesën më të madhe do ta kalojë në stol dhe do të jetë vetëm si lojtar rezervë për trajnerin Sadedini.