Skënderbeun e mund edhe Devolli, e ndëshkon një brazilian
Ekipi bardhekuq nuk po e kalon ngërçin psikologjik
Skënderbeu është mundur 2-3 në testin miqësor të zhvilluar dje në Korçë me ekipin e Devollit. Të dyja skuadrat bënë një lojë të bukur dhe me mjaft raste për shënim, pavarësisht terrenit të rrëshkitshëm për shkak të reshjeve të shiut. Nga njëra anë Skënderbeu ka dashur të shkarkojë ngarkesën e madhe që është akumuluar në këto ditë stërvitje dhe të provojë gjendjen e futbollistëve, ndërsa për Devollin ishte test i vlefshëm para nisjes së sezonit të Kategorisë së Parë. Një ndeshje që ka pasur brenda gjithçka, nga golat e shënuar te rastet e shumta të humbura. Skënderbeu zbriti në fushë me pjesën më të madhe të titullarëve dhe menjëherë u tregua i rrezikshëm. Bregu bëri gjithçka mirë nga e majta, hyri në zonë dhe krosoi për Xhon, i cili goditi me kokë, duke e përplasur topin në traversë dhe pastaj mbi vijën fatale. U krijua iluzioni i golit, por jo. Devolli u hodh në sulm dhe Rapo shpërtheu në të djathtë, harkoi në zonë dhe topi u kontrollua nga Koliçi, i cili në nxitim e sipër ia dorëzoi brazilianit Frenki Pavia, i cili nuk fali dhe i kaloi miqtë në avantazh. Trajneri Daja u dha disa këshilla të tijve pas golit të pësuar, por Skënderbeu vijon të vuajë mungesën e motivimit në lojë përballë kundërshtarit. Frenki Pavia shënoi golin e dytë për Devollin, duke treguar potencialin e tij. Me rezultatin 0-2 u mbyll pjesa e parë.
Në pjesën e dytë bardhekuqtë ndryshuan shumë elementë dhe ende pa u mbushur një minutë lojë, Muzaka harkoi në zonë për të gjetur saktësisht Oto Xhon. Goditja e tij me kokë la të shtangur portierin Mali, por topi u përplas në shtyllë. Skënderbeu e rriti forcën sulmuese dhe do të vijë goli i parë me Ajetib, i
cili goditi bukur dhe i çoi shifrat në 1-2. Pas golit Skënderbeu vazhdoi të sulmonte për të bërë përmbysjen e rezultatit, ndërsa Devolli nga ana tjetër u mundua të organizohej. Kur kishin mbetur më shumë se 15 minuta lojë nga fundi i ndeshjes, Skënderbeu fiton
një 11-metërsh, që u kthye në gol nga kapiteni Gjergji Muzaka, duke barazuar kështu rezultatin. Ekipet u dukën të kënaqura nga ky barazim dhe loja pësoi rënie, por në fund ka një 11-metërsh edhe për Devollin. Portieri Mali e mori përsipër ekzekutimin
nga pika e bardhë dhe mposhti portierin e U-19-ës të Skënderbeut, që i ishte bashkuar skuadrës në këtë takim. Mbyllet kështu me fitoren e Devollit ky test miqësor, që u ka shërbyer të dy trajnerëve për të parë nga afër gjendjen e lojtarëve.