CR7, ‘plakushi’ që vrapon me 34 km/h
Ylli i Juventusit dhe i Portugalisë regjistroi shpejtësinë e frikshme ndaj Napolit “Njeriu i erës” në Serinë A mposht këdo, edhe Gjimshiti mes “sprinterëve” më të mirë
“Njeriu i erës" është nofka që përfaqë son vetëm një person të vetëm, i njohur në të gjithë botën dhe emri i tij, Usain Bolt, do të jetë i pavdekshëm. Sprinteri xhamajkan, i cili vendosi të tërhiqet nga fushat e tartanit, vendosi rekordin global të 100 metrave në Botërorin e vitit 2009, me kohën: 9 sekonda e 58 të qindtat, duke kapur një shpejtësi maksimale prej 44.72 kilometrash në orë, ndërsa mesatarja e vrapimit të tij ishte prej 37.58 kilometrash në orë. Gjithsesi, në vitin 2019, ndonëse ka ende legjenda të gjalla të sportit që vazhdojnë të jenë protagonistë në "specialitetet e tyre", si për shembull Roxher Federer (38 vjeç) dhe Serena Uilliams (37 vjeç) në tenis; apo LeBron Xhejms (34 vjeç) në basketboll; apo akoma më shumë Mani Pakuaio (40 vjeç) në boks, ka një detaj që ndoshta për pak kaloi pa u vënë re, por jo për të përditshmen italiane, "Gazzetta dello Sport". "Njeriu i vërtetë i erës", Usain Bolt, vërtet mund të jetë tërhequr, por ndërkohë ai që po mrekullon me shpejtësinë e tij është një 34-vjeçar, i quajtur Kristiano Ronaldo. Po, pikërisht kështu, sepse për portugezin e Juventusit, edhe pse vitet vazhdojnë të ecin, ai konfirmohet në ritme fizike të frikshme, edhe pse si profesion ka që të shënojë gola. CR7, i cili siç dihet është një maniak për të kuruar dhe mirëmbajtur fizikun e tij, ka regjistruar një shpejtësi të frikshme në ndeshjen ndaj Napolit. Në aksionin e golit të parë, të shënuar nga Danilo, Duglas Kosta vrapoi me top në këmbë për gati 70 metra përpara se të pasonte për bashkatdhetarin e tij, por aksionin e ndoqi edhe Ronaldo, i cili me shpresën se topi mund të pasohej në këmbët e tij vrapoi me një shpejtësi prej 34.62 kilometrash në orë. E pabesueshme, por e vërtetë, por "jashtëtokësori" me pasaportë portugeze, edhe pse 34vjeçar konfirmohet më i shpejtë se Duglas Kosta, apo edhe se kushdo futbollist tjetër i fundjavës së lënë pas në Serinë A, apo edhe në ligat e të gjithë Europës (mbrojtësi shqiptar, Berat Gjimshiti i Atalantës është i katërti në renditjen me shpejtësi me 34.26 km/h). I vetmi që e ka mposhtur ka qenë Kostas Manolas, mbrojtësi grek i Napolit, i cili në javën e parë vrapoi në fushë me 35.41 kilometra në orë. Shkurt, Kristiano Ronaldo nuk rresht së mahnituri teksa e sheh në fushën e lojës, por i vetmi që nuk habitet për këtë fizik prej përbindëshi është ndoshta vetë ai. "Plakushi" i Juventusit është gati të vrapojë sërish, sepse siç vetë ai e ka konfirmuar, ka ende objektiva për të arritur në kar
rierë, por ndoshta ai më i afërti është çmimi "The Best" i FIFAs, i cili është në program më 23 shtator, në teatrin "La Scala" të Milanos. Edhe në këtë garë për çmimin individual ai do të ketë si rivalë Lionel Mesin dhe Virxhil Van Dajkun, ashtu sikurse në çmimet UEFA për "Futbollistin e Vitit", por në këtë rast, CR7 shpreson edhe më shumë që të jetë ai fituesi, duke marrë parasysh se në këtë votim pritet që të vlejë shumë më tepër kriteri i suksesit në Ligën e Kombeve me Portugalinë, trofeu i dytë në rang kombëtareje për 34-vjeçarin.