Spanja, rotacion masiv kundër Ishujve Faroe
Trajneri Moreno nuk do surpriza: Të fitojmë çdo ndeshje
Formacioni që Robert Moreno do të hedhë në fushë sot përballë Ishujve Faroe vështirë se do të ketë të bëjë me atë që luajti kundër Rumanisë tri ditë më parë në Bukuresht. Lodhja e ndeshjes ndaj rumunëve, por sidomos diferenca e madhe mes dy kombëtareve që sfidojnë sot njëra-tjetrën, lejon një rotacion masiv në radhët e “La Roja”-s. Diçka e tillë ishte parë edhe në qershor, kur Spanja luajti në transfertë ndaj Ishujve Faroe e më pas kundër Suedisë. Si pasojë e “erës së ndryshimeve”, sot në “El Molinon” të Gihonit, pritet të luajnë nga minuta e parë Karvahal, Gaja, Rodri, Tiago, Pareho dhe Suso, të cilëve u shtohet De Gea. Hermoso, Ojarzabal dhe Sarabia do të plotësojnë së bashku me kapitenin Ramos njëmbëdhjetëshin fillestar për ndeshjen kundër Ishujve Faroe.
TRAJNERI – Për Roberto Morenon kjo do të jetë ndeshja e dytë në krye të Spanjës. Tekniku pranon se do të ketë rotacion masiv krahasuar me ndeshjen kundër Rumanisë, ku gjithsesi Spanja bëri detyrën, duke fituar. Tri pikët janë të detyrueshme edhe sot, me trajnerin që në konferencë
për shtyp deklaroi: “Sigurisht që do të ketë ndryshime, jo vetëm për çështje minutazhi e lodhjeje, por edhe për t’i dhënë besim të gjithë grupit. Në një ekip që pretendon, janë të gjithë të rëndësishëm, ndaj kam besim se kushdo që do të zbresë në fushë, do të japë më të mirën për të treguar se meriton
të jetë këtu”. Spanja me një fitore do t’i konsolidonte pozitat e saj në krye të grupit, por me ende pesë ndeshje për t’u luajtur, Moreno kërkon të shmangë çdo surprizë të pakëndshme dhe fitorja ndaj Ishujve Faroe është thelbësore në këtë aspekt. “Jam shumë i kënaqur me ato që pashë kundër Rumanisë, por
kjo nuk do të thotë se nuk mund të përmirësohemi, sidomos në aspektin mbrojtës, kur rivali niset në kundërsulm. Fillimisht duhet të sigurojmë kualifikimin, megjithatë të gjithë e dimë se ku mund të ndërhyjmë për të zgjidhur problematikat që na shfaqen”, përfundoi Moreno.