Nejmar me gol dhe asist, spektakël mes Brazilit dhe Kolumbisë
Barazim në Majami, “O’Ney” shënjestron Pelenë për historinë
Miqësorja e luksit me Brazilit e Kolumbisë, e luajtur dje në Majami, respektoi të gjitha pritshmëritë. Gola, spektakël dhe grinta tipike e ekipeve latine, sidomos kur përballë janë dy formacione të stërmbushura me yje. “Vallet” i hapi Kasemiro, i cili gjeti rrugën e rrjetës në minutën e 19-të pas zhvillimeve të një goditjeje këndi. Ekzekutim i Nejmarit nga flamuri për kokën e mesfushorit të Realit që nuk gabon në shënjestër, teksa Ospina kapet në befasi. Tri minuta më pas Kasemiro është përsëri protagonist, por këtë herë negativisht. Një ndërhyrje e madrilenit sanksionohet me karton të verdhë, i cili do të jetë i vetmi i ndeshjes, pavarësisht se nuk munguan ndërhyrjet në limite të rregullores. Në minutën e 25-të Aleks Sandro shkakton faull në zonën e tij dhe për arbitrin amerikan Elfat nuk ka dyshime që është 11metërsh. Muriel rrëmben sferën
dhe mposht me ftohtësi Edersonin që nuk mundet të ndalë goditjen e saktë të sulmuesit të Atalantës. Nuk kalojnë as dhjetë minuta dhe Muriel gjen golin e avantazhit. 28vjeçari lëshon një silurë, e cila përfundon në trekëndësh, duke mos i lënë asnjë mundësi reagimi Edersonit që tentoi më kot të ndalte sulmuesin.
– Pjesa e dytë është më e përmbajtur në ritëm, por sulmet dhe kundërsulmet mbeten një konstante. Megjithëse miqësore, Brazili e Kolumbia i japin jetë një sfide, e cila argëton mbi 65 mijë të pranishmit në stadiumin e Majamit. Në minutën e 58-të vjen edhe momenti i Nejmarit. Protagonist absolut i sulmit brazilian, sulmuesi i PSG-së gjen golin pas një vertikalizimi të Kutinjos për Danil Alveshin, i cili kroson saktë në zonën e vogël ku “O Ney” nuk fal.
Goli i 61-të për të me fanellën e “Seleçao”-s, teksa në horizont duket Pele, që me 77 gola është shënuesi më i mirë i të gjitha kohërave për kombëtaren karioka. Për t’u theksuar vlen fakti se Nejmar mungonte prej qershorit, kur për shkak të një dëmtimi, u detyrua të braktiste
Brazilin që do të fitonte edicionin “shtëpiak” të Copa America. Sa i përket Serisë A, minuta të plota për juventinët Kuadrado dhe Aleks Sandro, teksa milanisti Paketa vijon të ketë minutazh të reduktuar. Vetëm dhjetë minuta ndaj Kolumbisë, përfshirë edhe shtesën.