Milito: Inter, me ‘Suning’ për tripletë
"Finalja e Champions-it momenti më i bukur! Lautaro kampion, nuk kam dyshime"
Një intervistë e gjatë, për të treguar ro lin e tij si drejtues te Rejsing Avejaneda dhe për të përshkuar aventurën e jashtëzakonshme të kaluar me ngjyrat e Interit, ku në 2010ën ishte protagonist absolut i tripletës. Diego Milito, "Princi" për tifozërinë zikaltër, është prononcuar për mikrofonat e mediave italiane, mes së kaluarës, së tashmes dhe së ardhmes. Me një urim: Që ky të jetë viti i interistëve.
FITORET SI LOJTAR DHE SI DREJTUES
- "Është e qartë që ka ndryshime mes dy roleve, - ka nisur argjentinasi. - Nuk është e njëjta gjë të bësh lojtarin, ku shumë gjëra varen nga paraqitjet në fushën e lojës. Në pozicionin e menaxherit apo drejtuesit sportiv, jo gjithçka është në duart e tua, janë të shumta aspektet përtej formimit të një skuadre të mirë. Futbolli nis të përjetohet në një tjetër mënyrë: së pari ndeshjet shihen nga tribuna. Roli i drejtuesit luan një pjesë thelbësore: ndjek linjën që do të duhet të ndjekë klubit dhe ekipi, zhvillon edhe takimet me trajnerin. Në fund është edhe personi që flet me liderët e klubit".
- Më tej, disa fjalë për Lautaro Martinezin, ish-lojtar i Rejsingut, i transferuar në Milano
LAUTARO
pikërisht falë këshillës së Militos. "Çfarë i nevojitet për t'u afirmuar si numër 9 titullar tek Argjentina? Kohë. Duket qartësisht që është një lojtar i madh dhe nuk kam dyshime se do të paraqitet mirë me kombëtaren tonë. Duhet të zbresë më shpesh në fushën e lojës dhe të grumbullojë sa më shumë ndeshje për të fituar eksperiencë. Nuk do ta ketë të lehtë të afirmohet, sepse, për fat të mirë, kemi sulmues të mëdhenj në përfaqësuese. Në të vërtetë, më pëlqejnë shumë sulmuesit. Kemi Lautaron, Kun Agueron, Higuaini është në formë".
FINALJA E CHAMPIONS-IT 2010
- Radhën e kanë disa mendime për të shkuarën, ku një vend të rëndësishëm në sirtarin e kujtimeve ka finalja e fituar në 2010-ën kundër Bajernit të Mynihut. "Ndeshja më e rëndësishme e karrierës sime? Sigurisht: për peshën e një finaleje të Champions-it, çfarë simbolizonte për Interin në atë moment dhe për mua personalisht. Nuk ka krahasime. Ishte një gëzim i madh për Interin të kualifikohej në finale pas 45 vitesh. Tifozëria, presidenti dhe e gjithë bota interiste e dëshironin. Fitorja me Barçën në gjysmëfinale pati emocionet e saj, sepse dominuam skuadrën më të mirë në botë". Trajner në atë kohë ishte Murinjo: "Luajti një rol thelbësor, ishte pika jonë e referimit, udhëheqësi. U qëndroi gjithmonë pranë lojtarëve".
INTERI I SOTËM
- Në fund, aktualiteti dhe e ardhmja: "Interi ka pasur shumë ndryshime pronësie gjatë viteve të fundit pas largimit të Moratit. Sot, megjithatë, me afrimin e 'Suning'-ut ka gjetur drejtimin e duhur. Dua që ky të jetë viti i Interit dhe me krerët e rinj të ritentohet tripleta".