Pakt “zotërinjsh” për Mbapenë, Perez gati t’ia dhurojë Zidanit

Sapo ka mbaruar merkatoja verore, por te Reali i Madridit po thurin plane për strategjinë e vitit të ardhshëm. Pasi patën vështirësi në afrimin e yjeve si Nejmar apo Pogba, madrilenët synojnë që pas një viti të sjellin në “Santiago Bernabeu” Kilië Mbapenë. Faktin që kanë zgjedhur të investojnë te francezi është një tregues i qartë se “O’Ney” ka si zgjedhje të parë Barcelonën. Sipas mediave iberike, Zinedin Zidan ka qenë i qartë me Florentino Perezin në lidhje me përforcimet që kërkon në skuadër. Pavarësisht se ndoqi për javë me radhë Pol Pogbanë, Zizu duket se ka zgjedhur të ketë tjetër prioritet për verën e vitit që vjen. Tekniku i “Los Blancos” ka identifikuar te 20-vjeçari francez emrin që kërkon të stërvisë, madje ka mundur t’i rrëmbejë edhe një premtim presidentit Perez në lidhje me afrimin e sulmuesit. Në sezonin e kaluar, Mbape shënoi 39 gola dhe dha 17 asiste në të gjitha kompeticionet e luajtura me PSG-në, teksa sivjet ka shënuar dy gola deri tani. Pavarësisht fillimit të mirë, ai është dëmtuar kundër Tuluzës, çka e ka detyruar të bëjë një muaj pushim, por joshja ndaj Zidanit nuk pritet të pësojë rënie. Siç konfirmojnë mediat iberike, Zizu ka një pakt “gentleman”-ësh me Florentinon dhe në rast se bashkëpunimi i tyre jep frute gjatë sezonit në fjalë, atëherë presidenti në verën e ardhshme do të detyrohet të hapë bllokun e çeqeve për t’i plotësuar trajnerit dëshirën për bashkëkombësin. Falë moshës, por sidomos potencialit, Mbape cilësohet si njeriu i duhur për të hapur një faqe të re në historinë e “Los Blancos”, të cilët pas largimit të Ronaldos kanë shfaqur problematika të shumta si në nivelin e rezultateve dhe golave e po ashtu në atë të lidershipit.