Prestige ndalet në gjysmëfinale, sot për medalje
Sot ndaj bullgarëve për vendin e tretë në Champions
Prestige MFC zhvilloi dje dy ndeshjet e saj të radhës në Champions-in e minifutbollit që po mbahet në Rimini të Italisë. Kampionët e Shqipërisë vazhdojnë të shkëlqejnë me paraqitjet e tyre, duke qenë ndër ekipet më elitare të këtij kompeticioni dhe duke e përfaqësuar Shqipërinë në mënyrë shumë dinjitoze. Prestige zbriti në fushë paraditen e djeshme, ku në orën 10:00 u përball në çerekfinale me skuadrën boshnjake Ecos Vitez. Këta të fundit Prestige i kishte shkatërruar në ndeshjet e grupeve me rezultatin 4-0. Ndonëse në këtë takim kryeqytetasit paraqiteshin sërish pa kapitenin Fatmir Hysenbelliu, ata ia dolën duke triumfuar pastër në shifrat 2-0. Shima në pjesën e parë dhe Dajti në të dytën ishin autorët e golave në një tjetër fitore të madhe që skuadra shqiptare arrin në këtë event. Me këtë triumf Prestige rishkruan historinë, duke prerë biletën mes katër ekipeve më të mira të kontinentit në minifutboll.
Siç dihet, Champions-i i minifutbollit është një kompeticion me ndeshje shumë të ngjeshura dhe vetëm pas disa orësh Prestige duhet të zhvillonte takimin gjysmëfinal ndaj rumunëve të Nova Vita Targu Mures. Edhe në këtë sfidë kampionët janë privuar nga lideri Hysenbelliu, i cili vazhdon të vuajë dëmtimin e nuk ishte i gatshëm për ta ndihmuar skuadrën. Lodhja dhe ngarkesa e madhe e këtyre ditëve fillojnë të shfaqen në lojën e Prestige. Megjithatë, skuadra nga Tirana vendoset mirë në fushë dhe mbron në mënyrë të shkëlqyer. Pjesa e parë mbyllet në barazim pa gola. Në të dytën rumunët fillojnë të ushtrojnë më shumë presion, por mbrojtja e Prestige funksionon më së miri. Shima ka një mundësi të mirë për të gjetur golin, por goditja e tij në gjysmëlartësi përfundon ngjitur me shtyllën pingule në të majtë të portierit. Kur dukej se ndeshja po u drejtohej penalltive, MirçeaCiprian ekzekuton në mënyrë perfekte një goditje standarde, duke u dhënë avantazhin rumunëve 5 minuta nga fundi. I njëjti lojtar realizon sërish nga goditja standarde në të 40-tën dhe vulos fitoren e të tijve 2-0. Megjithatë, aventura e Prestige nuk merr fund këtu, pasi kampionët e Shqipërisë do të kenë mundësinë për të luftuar për medaljen e bronzit, që është gjithsesi një arritje shumë e madhe. Sot në orën 11:00 kryeqytetasit do të zhvillojnë ndeshjen për vendet 3/4, ku do të përballen me skuadrën bullgare KCM 2000 Group Plovdiv. Ndonëse ishte vetëm prezenca e dytë në këtë kompeticion, Prestige arriti të linte gjumë në Champions, duke iu afruar shumë ëndrrës së finales, aty ku sot do të luftojnë për trofeun rumunët e Nova Vita Targu Mures dhe hungarezët e Airnergy Mad Dogs.