Frymëzoi Spanjën, por Suso mbetet problem te Milani
Montela e Rino dështuan, trajneri i ri ka një rol për sulmuesin
Vinçenco Montela dhe Rino Gatuzo u munduan pa marrë ndonjë reagim pozitiv. Tashmë me rolin e Hezus Susos po merret Marko Xhampaolo. Pozicioni i spanjollit ka qenë një ndër problematikat më komplekse të Milanit në sezonet e fundit dhe trajneri i ri prej korrikut po e vlerëson në rolin e fantazistit. Ndaj Breshas, në lojë e sipër, e spostoi në të djathtë, por ndaj Veronës Suso do të luajë përsëri pas pykave. 25-vjeçari ishte ndër kuqezinjtë më të përfolur për largim, por pas vetos së Xhampaolos, drejtuesit vendosën të mos e shisnin, edhe sepse në drejtim të klubit nuk erdhi oferta e shumëpritur prej më shumë se 40 milionë eurosh.
NË QENDËR TË MILANIT
- Kur pa sirenat e merkatos që të shtoheshin rreth Susos, tekniku i "Djallit" deklaronte: "Suso është një lojtar klasi dhe të tillë futbollistë Milani nuk i shet". Pavarësisht problemit të rolit, trajneri vijon ta konfirmojë dhe promovojë talentin e Susos, duke vendosur pikërisht spanjollin në qendër të Milanit. Diçka të tillë, siç thamë, e kanë provuar edhe të tjerë, por numri 8 kuqezi vijon të mos e kalojë provimin. Xhampaolo beson shumë dhe fakti që klubi nuk i afroi një fantazist "puro" është një tjetër sinjal se nuk janë të paktë ata që besojnë te e majta e spanjollit, me shpresën se djaloshi i lindur në Kadiz të shpërthejë njëherë e mirë pas sezonesh radhazi me shumë ulje-ngritje.
SPANJA SHEH "DJALLIN"
- Roli i Susos mund të shndërrohet në çelës suksesi për Milanin, por edhe për të qenë pjesë e kombëtares spanjolle. Suso ishte ndër më të mirët në fitoren e "La Roja"-s kundër Ishujve Faroe dhe, sipas mediave spanjolle, meriton një rol fiks, por për të ecuria Milan- Spanjë është reciproke për karrierën e tij. Nga aeroporti i Malpensës ku mbërriti dje në mbrëmje, 25vjeçari deklaroi: "Duhet të fitonim dhe ia dolëm të kryenim misionin tonë, duke shprehur edhe një lojë të mirë. Këto ndeshje duken të lehta kur dikush krahason vlerën e ekipeve që zbresin në fushë, por ka raste kur bllokohen dhe shndërrohen në problem. Më vjen mirë që isha pjesë e fitores dhe uroj që të jem pjesë e kombëtares edhe në të ardhmen, por kjo është një dëshirë që çdo futbollist e ka. Të gjithë duam te jemi pjesë e Spanjës, por thirrja varet nga ajo që bën me skuadrën tënde në klub. Me Milanin sapo kemi nisur sezonin dhe në të tilla situata është e rëndësishme të ruash ritmin me kundërshtarët".