Ndryshon formacioni, ja prapaskenat me Berishën
Reja ul Mavrajn në stol, Memushaj e Lenjani rikthehen titullarë
Edi Reja ka vendosur të bëjë gjashtë zëv endësime për ndeshjen e sotme ndaj Islandës. Siç edhe e paralajmëroi gjatë konferencës së djeshme, që nga kapiteni Mavraj dhe deri në sulm priten të tjerë futbollistë për t'i dhënë ekipit energji të reja për sfidën vendimtare. Nga dje, është mësuar se Etrit Berisha është larguar nga grumbullimi për probleme fizike, ndërkohë që "Panorama Sport" zbulon ekskluzivisht prapaskenat në ekipin kuqezi.
Gjashtë futbollistë pritet të jenë ndryshe nga përballja e fundit me Francën. Në stol do të ulen Mavraj, Roshi, Abrashi, Ramadani, Uzuni dhe Balaj. Mavraj i lë vendin Dermakut në qendër të mbrojtjes. Skema e lojës është sigurisht e njëjta, 3-5-2, por me Lenjanin dhe Hysajn nga krahët, bëhet fjalë për një ekip që do të ketë jo vetëm detyra mbrojtëse, por edhe qartësi dhe agresivitetin e duhur për të sulmuar vazhdimisht. Trajneri ka vendosur që në linjën e majtë të rikthejë titullar Ermir Lenjanin, futbollisti që po kalon formë të shkëlqyer në Zvicër. Hysaj në të djathtë dhe Gjimshiti e Ismajli do të mbajnë peshën e prapavijës, përpara Thomas Strakoshës. Në mesfushë, trajneri duket se ka vendosur të konfirmojë titullar vetëm Keidi Baren, për të cilin shprehu elozhe edhe pas Francës. Përkrah fierakut, Gjasula dhe Memushaj pritet të kenë peshën e vendosjes së ekuilibrave. Në sulm, pritet autori i golit të nderit Sokol Cikalleshi dhe sulmuesi që vjen me dy gola radhazi me kuqezinjtë. Përkrah tij, Manaj duket i avantazhuar, duke marrë në konsideratë edhe energjitë që shpenzuan dyshja Balaj-Uzuni në transfertën franceze.
Etrit Berisha është larguar dje nga grumbullimi dhe vendin e tij e ka zënë pas pasdites së djeshme Gentian Selmani. "Kemi një ndryshim në listën e Kombëtares A. Për arsye dëmtimi është larguar sot Etrit Berisha dhe vendin e tij e merr Gentian Selmani nga U-21", njoftoi dje në mesditë zyra për shtyp e FSHFsë. "Panorama Sport" ka zbuluar ekskluzivisht edhe prapaskenën me portierin e SPAL-it. Ai ishte projektuar për të qenë titullar ndaj Francës dhe gazeta ka mësuar nga burime konfidenciale pranë kuqezinjve se portieri është tërhequr ditën e fundit para përballjes me "gjelat" dhe i ka kërkuar trajnerit që të mos jetë në fushën e lojës. Arsyeja për këtë kërkesë të tij ka qenë se nuk ndihet në 100% të formës, për shkak të dhimbjeve në këmbë. Kjo kërkesë është pranuar nga Reja dhe stafi i tij dhe ditën pasi ekipi është kthyer në vendin tonë, stafi mjekësor ka vendosur të bëjë një kontroll të specializuar. Në të vërtetë, është vënë re në rezonancë që bëhet fjalë për një inflamacion (enjtje), por gjithsesi jo e gradës sa për të ndaluar një portier të jetë në fushën e lojës. Dje është përcaktuar edhe nisja e tij drejt Italisë, ku rreth orës 12:00 ka lënë tokën shqiptare për të fluturuar jashtë vendit.