Zhbllokimi i sulmit, në Ballsh tani duan “kokën” e Kukësit

Bylisi është i gjithi i përqendruar te Kukësi. Pasi mposhtën Skënderbeun në transfertë, tashmë ka ardhur koha që të marrin të parin trepikësh në “Adush Muça”. Të lehtë nuk do ta kenë, e sidomos kur dihet potenciali dhe synimet që kundërshtari ka. Por, kjo gjë nuk e step aspak ekipin e drejtuar prej Veljko Dovedanit. Ata do të futen në fushe me idenë e qartë për të vijuar me rezultate pozitive. Skuadra ka zbritur dje në fushën e stërvitjes, duke nisur zyrtarisht javën anti-Kukës. Skuadra është grumbulluar, duke i kushtuar rëndësi të veçantë këtij 90-minutëshi që përkon edhe me rifillimin e sezonit pas pauzës. Me rezultatet e arritura së fundmi, edhe tifozët kanë rritur dukshëm interesin për skuadrën e tyre të zemrës. Pritet që këtë fundjavë të jenë të shumtë, ndryshe nga takimi me Vllazninë, ku munguan edhe prej temperaturave të larta. E fundit herë që këto dy ekipe janë ndeshur me njëra-tjetrën, përkon me sezonin 2015-2016. Ishte 2 prilli i 2016-ës, kur ballshiotët mposhteshin në shtëpi me rezultatin 2-0. E megjithatë, tashmë është tjetër “melodi”. Ekipi vjen pas një fitoreje bindëse në Korçë, ndërsa miqtë pas barazimit me Laçin në “shtëpi”. Por, më shumë se morali, mallakastriotët lakmojnë zonën “Euro” këtë vit. Ndaj, për të dëshmuar që janë vërtet pretendentë, duhet ta tregojnë përballë nënkampionëve në fuqi të vendit. Grupi nuk do të jetë i plotë dhe kjo dihet, pasi Antoni dhe Hadroji mungojnë dhe për këtë shkak nuk ishin as dje në stërvitje. Megjithatë, janë rikuperuar Goxha e Bajramaj. Pritshmëritë janë të mëdha prej sulmit dhe fakti që Guindo u zhbllokua ndaj korçarëve, Mishel shënoi në miqësorë përballë Apolonisë, jep shpresë që edhe golat nuk do të mungojnë.