Hidhet shorti, kaos me stadiumet në Kategorinë I
Në Lushnjë, Peqin, Lezhë dhe Fushë-Krujë luhet çdo javë
Vonesa e hedhjes së shortit për kalen darin e Kategorisë së Parë paska pasur një arsye të fortë. Jo pak, por katër skuadra nuk kanë një stadium të licencuar për të zhvilluar ndeshjet e kampionatit dhe duket se me vështirësi kanë gjetur një stadium “borxh”, duke e bërë situatën mjaft kaotike. Shefi i sektorit të garave në FSHF, Lysien Nurishmi, ka bërë të ditur para hedhjes së shortit se janë katër skuadra që nuk luajnë në qytetin e tyre, për shkak të stadiumit. “Disa skuadra kanë pasur probleme me licencimin e stadiumeve dhe do t’i zhvillojnë ndeshjet si pritëse në qytete të tjera. Për këtë arsye, në hedhjen e shortit duhet që për këto skuadra të shmangim zhvillimin e ndeshjeve brenda fushe në të njëjtën javë, që të mos kenë probleme. Kastrioti, Besa, Shënkolli dhe Egnatia nuk luajnë në stadiumet e tyre. Besa do të luajë në Lushnjë, Shënkolli në Lezhë, Kastrioti në Fushë-Krujë dhe Egnatia në Peqin”, ka bërë të ditur Nurishmi. Duke parë vonesën e gjatë në hedhjen e shortit, u duk se kampionati do të shtyhej. Gjithsesi, në Shqipëri jemi mësuar me situata të tilla dhe nuk konsiderohet ndonjë çudi e madhe hedhja e shortit 5 ditë para ndeshjes së parë zyrtare të kampionatit. Për stadiumet është gjetur një zgjidhje, që kuptohet se dashje pa dashje do të ndikojë për përkeqësimin e atyre impianteve, ku do të luhen ndeshje çdo javë.
STADIUMI I KAVAJËS – Pak kohë më parë, kavajasve iu ngrit mendja se do të luanin në Superiore, kur në skenë doli skenari se nga Superiorja mund të përjashtoheshin Skënderbeu apo edhe Luftëtari. Por, ishte një ëndërr, sepse në elitë nuk mund të shkosh pa stadium. Në stadiumin e Kavajës po shtrohet tapeti dhe kërkon ende kohë për t’u bërë gati. Ndoshta Besa do të kthehet në shtëpi pas dy muajsh, nëse gjithçka shkon mirë sa u takon punimeve. Kështu, dy skuadra rivale në të njëjtin grup, si Lushnja dhe Besa, do të luajnë në të njëjtin stadium.
MBINGARKESA – Jo vetëm “Roza Haxhiu” do të ketë mbingarkesë ndeshjesh, por edhe stadiumi “Besëlidhja” i Lezhës, stadiumi i Peqinit dhe “Redi Maloku” i FushëKrujës. Kastrioti edhe këtë herë nuk ia doli në kohë ta bënte gati stadiumin për të luajtur në
shtëpi, por ashtu si sezonin e kaluar në Superiore, edhe Kategoria e Parë e gjen në FushëKrujë. Kastrioti dhe Iliria nuk janë në të njëjtin grup, ashtu si dhe Besëlidhja me Shënkollin, që do të luajnë në stadiumin e Lezhës, Iliria dhe Shënkolli këtë sezon janë spostuar në
Grupin B, për t’ia lënë vendin Egnatias dhe Shkumbinit në Grupin A. Pikërisht, këto të fundit do të luajnë në stadiumin e Peqinit, sepse stadiumi “Hasan Zyla” i Rrogozhinës nuk i plotëson kushtet për t’u licencuar nga FSHF-ja për Kategorinë e Parë.