Noka: Kam shpenzuar, pres Besëlidhjen në Superiore

Besëlidhja është njohur dje me kalendarin e kampionatit që doli nga shorti i hedhur në FSHF. Trajneri Elvis Plori ka bërë një analizë të gjatë me ekipin për gjithë fazën përgatitore që tashmë është mbyllur dhe ka nisur java anti-Korab. I pranishëm në këtë analizë ishte edhe presidenti Gjok Noka, i cili për “Panorama Sport” ka folur për shortin dhe objektivat e sezonit. “Jam shumë i kënaqur me kalendarin. Gjatë gjithë fazës përgatitore kemi punuar për ta përballuar kampionatin me sukses dhe besoj se do t‘ia dalim. Jam mjaft i kënaqur për faktin që shorti na solli si miq dibranët e Korabit, pasi edhe për Kupë tri ditë më pas do të jemi miq tek ata. Besoj se gjërat do të shkojnë shumë mirë. Fazën përgatitore e mbyllëm me ndeshjen miqësore ndaj Tiranës, ku humbëm, por për ne rëndësi kishte loja e skuadrës dhe impenjimi i futbollistëve. Kemi zhvilluar shumë ndeshje miqësore, me të cilat kemi treguar forcën tonë reale të cilën besoj se do ta ruajmë, madje do ta çojmë përpara. Humbja e thellë ndaj Tiranës erdhi si rezultat i aktivizimit të të gjithë futbollistëve, përfshirë edhe portierin i cili ishte i treti dhe pësoi tre gola. Humbjet nuk janë të mira, po ajo me Tiranën kishte edhe anën pozitive të saj, pasi na motivoi që të kritikojmë skuadrën dhe të bëjmë një analizë të gjatë, ku nxorëm përgjegjësitë. Jam i kënaqur me të gjithë, që nga trajneri dhe futbollistët e ardhur në merkaton verore. Tani jemi të përqendruar te sfida ndaj Korabit, që e luajmë në fundjavë këtu në Lezhë dhe duhet ta fitojmë. Pas tri ditësh do të luajmë në Peshkopi po ndaj Korabit, por për Kupë dhe aty kemi objektiva të qartë. Për objektivat afatgjatë të Besëlidhjes dihet se është ngjitja në Superiore dhe për këtë kam shpenzuar dhe punuar deri tani. Po ashtu, nuk do ta lëmë pas dore edhe Kupën e Shqipërisë. Në prag të kampionatit dua të përshëndes të gjitha skuadrat e Kategorisë së Parë, si të grupit tonë, ashtu edhe ato të Grupit B. U uroj suksese drejt objektivave që tashmë i kanë përcaktuar”. Preng Gjikola