Izmir Smajlaj pa fat, humbet Botërorin nga dëmtimi në tendinë
Viti 2019 vazhdon të jetë i pafat për atletin Izmir Smajlaj. Kalvari i dëmtimeve po e ndjek kampionin dhe rekordmenin shqiptar të kërcimit për së gjati. Një dëmtim në thembrën e Akilit është bërë shkak që Smajlaj të heqë përfundimisht dorë nga pjesëmarrja për në Kampionatin Botëror të Atletikës, i cili do të mbahet më 27 shtator deri më 6 tetor në Doha të Katarit. Kështu, Shqipëria humbet për këtë event një prej sportistëve më elitarë. Gazeta “Panorama Sport” kontaktoi me Gjergj Rulin, i cili, përveçse president i FSHA-së, është edhe trajner i sportistit shkodran. Ja si e shpjegoi Ruli gjendjen e atletit:
“Rrezikuam në Kampionatin Ballkanik disa ditë më parë në Bullgari, për të provuar gjendjen. Menduam se e kishim kaluar krizën, ndërkohë që në kërcimin e dytë, Smajlaj u dëmtua edhe më shumë. E kemi monitoruar gjendjen e tij prej ditësh, ndërsa në një kontroll që bëmë sot (dje) në Elbasan te një prej fizioterapistëve më të mirë, si Gjergj Biba, pamë gjendjen dhe mund të them që është alarmante. Fibrat e tendinës në thembër janë shumë të dëmtuara”, thotë Ruli, i cili konfirmon më pas tërheqjen nga Botërori: “Ne evituam që të shkojmë në Doha si turistë dhe morëm vendimin të mos marrim pjesë, ndonëse e kishim mbyllur akreditimin për këtë event. Sot do të bëjmë edhe aplikimin për në federatën botërore që ta zyrtarizojmë mospjesëmarrjen në këtë event”. Në fund, Ruli flet edhe për kohën që kërkon rikuperimi i këtij dëmtimi, ku me sa duket, situata është shumë e paqartë: “Ne kërkojmë të shërohet sa më shpejt dhe do të ishte fatale nëse do të shkonim për të garuar në Doha. Fatkeqësisht, mjekësia këtu lë shumë për të dëshiruar dhe ajo që mund të them është që Zoti e ndihmoftë, pasi për dy muaj fillon edhe faza përgatitore dhe nëse nuk e bën rrezikon shumë”, përfundon Ruli. Kështu, Shqipëria do të përfaqësohet në Doha vetëm me Luiza Gegën.