Botërori një kujtim i hidhur, Italia ka rilindur me Mançinin
“Axurrët” nuk arrinin 7 fitore që prej vitit 2003
Mungesa në Botërorin e vitit 2018 duket si një kujtim i largët. Italia e Roberto Mançinit i ndërpreu menjëherë marrëdhëniet me të shkuarën. Në Finlandë erdhi fitorja e gjashtë radhazi në po aq ndeshje të luajtura në kualifikueset e Europianit, e shtata radhazi nëse marrim në konsideratë edhe miqësoren kundër SHBA-së. Një ecuri e tillë nuk ndodhte që prej vitit 2003, kur në pankinën e “axurrëve” ishte Xhovani Trapatoni. Numra që flasin vetë dhe tregojnë ecurinë e Italisë që nga momenti kur drejtimin e mori Roberto Mançini. Rrugëtimi deri tani ka qenë i duhuri, por skuadra mund të përmirësohet akoma më shumë dhe duhet të tregojë të njëjtin personalitet, kur të përballet me skuadra më të forta në letër. Një tjetër aspekt pozitiv janë golat e shënuar dhe skuadra e Mançinit ka gjetur rrugën e rrjetës në 7 sfida radhazi, diçka që nuk ndodhte prej vitit 2016. ZGJEDHJET - Roberto Mançini ka vendosur të rinjtë në themelet e projektit të tij dhe është në kërkim të lojës së bukur dhe produktive. Rezultatet, në fakt, po i japin të drejtë. Italianët, edhe atëherë kur nuk bindin plotësisht, krijojnë shumë raste për të shënuar gol. Kjo është fryt i një pune që nis në mbrojtje. Manço u kërkon lojtarëve difensivë që të mos nxitohen dhe të jenë të
kujdesshëm në nisjen e lojës. Kjo “kulturë” vazhdon në mesfushë me Sensin dhe Barelën (pa harruar Zhorzhinjon dhe Verratin). Ishmesfushori i Sasuolos, pavarësisht penalltisë së shkaktuar, në pjesën e parë i shkoi shumë pranë golit. Një lojtar që mund të vendosë fatin e kombëtares dhe të Interit.
Shoku i tij i skuadrës zikaltër bindi gjithashtu. Në sulm Italia është duke shkëlqyer falë momentit pozitiv të Federiko Kiezës, por edhe golave të Belotit dhe Imobiles. Ky i fundit u zhbllokua dhe gjeti rrjetën pas një kohe të gjatë. Ishte i pari që shënoi në epokën e Mançinit. Sulmuesi i Lacios nuk shënonte me ko
mbëtaren italiane që nga shtatori i vitit 2018 kundër Izraelit dhe ky është një ogur i mirë për të ardhmen. Alternativat në stol nuk mungojnë dhe kjo Itali duket se ka rilindur dhe në Europianin e vitit 2020 pritet që të bëjë performanca të mira dhe të paraqitet si kandidate për ta fituar atë.