“Pokeri” në modë, Holanda luan me një portë në Estoni
Ekipi i Kumanit dhuron spektakël dhe fiton terren
Fitorja e rëndësishme kundër Gjermanisë ( 2- 4) në transfertë është shoqëruar me një tjetër triumf në Estoni. Holanda duket e rilindur dhe rikthehet seriozisht kandidate për një vend në Europianin 2020. Në Estoni fiton 0-4 falë golave të Babel (2), Depaj dhe Vajnaldum duke arritur në kuotën e 9 pikëve, me një ndeshje më pak sesa skuadrat e tjera të Grupit C.
ME NJË PORTË- EstoniHolandë luhet vetëm me një portë dhe rezulton ashtu siç ishte parashikuar nga të gjithë. “Tulipanët” sulmojnë gjithmonë kur kanë topin në këmbë, ndërsa vendësit mbrohen dhe mundohen të shfrytëzojnë kundërsulmin si armën e vetme për t’i bërë keq dyshes Van Dajk-De Ligt. Mjafton të shohësh statistikat e pjesës së parë për ta kuptuar, ku Estonia
nuk ka krijuar asnjë rast dhe nuk bëri asnjë goditje në portë. Holanda e fitoi fraksionin e parë me golin e Rajan Babelit, i cili shfrytëzoi mjaft mirë një rast të Dalej Blindit dhe e dërgoi topin në rrjetë. Holanda kishte të tjera mundësi për të shënuar, por portieri kundërshtar bëri detyrën në disa raste. Portokallinjtë ishin të vendosur vetëm në gjysmëfushë dhe nga ndeshja në ndeshje vazhdojnë të tregojnë përmirësim.
“POKER”- Një ndeshje kur fitohet 1-0 nuk është kurrë e sigurt, pavarësisht rivalit
që ke përballë dhe Kuman kërkoi që skuadra e tij ta “vriste” atë. Menjëherë me fillimin e pjesës së dytë ishte sërish Rajan Babel, i cili pas krosimit të Depajt nga e djathta gjendet i vetëm në zonë dhe me kokë e dërgon topin në rrjetë. Kaluan vetëm 3 minuta
dhe Holanda e pa veten me fitoren në “kasafortë”. Megjithatë, nuk hoqi dorë nga sulmet dhe bombardoi portën e Lempets. Kjo lojë sjell edhe golin e tretë, i cili mban firmën e Memfis Depaj. Sulmuesi e kontrollon mjaft bukur topin në hyrje të zonës
dhe me një goditje të zgjuar me të majtën e dërgon në rrjetë. Për ta bërë më të bukur mbrëmjen mendon Vajnaldum, i cili shënon golin e katërt për “tulipanët”. Mund të ishte 5-0 nëse Depaj do të tregohej më i saktë, por pak rëndësi ka.