Shënon më shumë se sulmuesit, Ramos: Dua edhe një Champions
Kapiteni i Spanjës lë pas Bekhamin dhe Totin
Serxho Ramos ka për detyrë që të mbrojë portën e Spanjës dhe të mos i lejojë sulmuesit kundërshtarë që të shënojnë gola, por nuk e humbet kurrë rastin për të shënuar kur i jepet mundësia. Pas golit që shënoi me Rumaninë, kapiteni i Spanjës është bërë pjesë e dhjetë golashënuesve më të mirë të historisë së kombit të tij me 21 gola. Në sfidën kundër Ishujve Faroe barazoi Iker Kasijasin për prezenca (167) me Spanjën dhe nuk ka ndërmend që të tërhiqet. Ishportieri i Spanjës e ka uruar dhe e ka vlerësuar kapitenin aktual për ecurinë e jashtëzakonshme me kombëtaren. Ai dëshiron të thyejë rekorde të njëpasnjëshme. Mjaftojnë disa të dhëna për të kuptuar se çfarë ecurie të frikshme ka pasur Ramos me Spanjën. Ai ka shënuar po aq gola sa Stiven Xherrard me Anglinë, por më shumë sesa Bekham, Riberi, Kutinjo, Tevez dhe Françesko Toti. Ndryshimi i vetëm dhe i madh është që të gjithë lojtarët e mësipërm kanë qenë më afër portës kundërshtare sesa Ramos, edhe pse ky i fundit i ka shënuar me penallti. Ai foli pas ndeshjes me Ishujt Faroe dhe tha se dëshiron një tjetër Champions me Realin dhe 200 ndeshje me kombëtaren.
OBJEKTIVAT- "Rekordet janë bërë për t'u thyer. Unë vazhdoj të punoj me dëshirë dhe ambicie të mëdha. Shpresoj të jem ende në këtë nivel dhe të arrij 200 ndeshje. Ky është objektivi im".
TRAJNERI- "Mendoj se Robert Moreno është shumë komod me ne dhe ne jemi të përqendruar maksimalisht për t'i zbatuar detyrat e tij. Ai i njeh mirë rregullat e dhomave të zhveshjes dhe të futbollit. Mund të na ndihmojë shumë për të luajtur mirë".
KASIJAS- "Pata mundësinë që të debutoj shumë i ri me kombëtaren dhe trajnerët më kanë dhënë gjithmonë besim. Fjalët e Kasijasit janë shumë të rëndësishme për mua".
REALI- "Dua të fitoj një tjetër Champions. Skuadra është e motivuar në maksimum dhe besoj se do të bëjmë një sezon të shkëlqyer".