Interi kryeson i vetëm, Fiorentina gjymton Juventusin
Sfidë me pak emocione, por milanezët nuk falin. De Paul “skuqet” pasi goditi Kandrevën Zikaltërve u mjafton Sensi, Konte momentalisht i pari dhe i vetmi me pikë të plota
-
Një metër e 68 dhe një nuhatje goli i mjaftojnë Stefano Sensit për të vendosur fatet e Inter-Udineze, me një goditje me kokë. Një sfidë ku pati pak raste nga të dyja skuadrat, me bardhezinjtë që ishin vendosur "pasqyrë" në fushë për të pakësuar rreziqet. Ndeshje e shënuar edhe nga kartoni i kuq i De Paulit në të 35-ën, pas një shuplake ndaj Kandrevës. Përfundon 1-0 për zikaltrit, të cilët fluturojnë të vetëm në krye të klasifikimit me pikë të plota pas tri javësh, në pritje të Torino-Leçe.
I KUQ DHE GOL - Zikaltrit shkojnë menjëherë një hap larg golit: në të 5-ën Sensi bën spondë për Politanon, i cili zbret në qendër dhe nga limiti i zonës së rreptësisë lëshon të majtën; mposht portierin Muso, por topi përfundon në shtyllën e djathtë të kuadratit. Interi merr që në fillim kontrollin e situatës, duke qarkulluar lehtësisht sferën, edhe pse hasin vështirësi në finalizimin e aksioneve të ndërtuara. Pas Sensit përpiqet të krijojë rrezik Barela (i cili në një çast më vonë rrezikon seriozisht të përjashtohet me karton të kuq, por arbitri Marani e fal dhe i tregon të verdhin), goditja e të cilit në të 20-ën përfundon shumë larg portës. Ndërsa Udinezes i mungon thuajse totalisht faza sulmuese, përtej një tentative të Uollasit në të 24-ën, e cila do të nevojitej më shumë për të shqetësuar Handanoviçin. Nëse arbitri për Barelën mendoi vetëm "paralajmërimin", e kundërta ka ndodhur me De Paul. Në të 34-ën, argjentinasi, i provokuar nga Kandreva, reagon keq dhe godet me shuplakë të hapur italianin; gjest ky, që nuk u shpëton telekamerave dhe Guida në VAR thërret menjëherë kryesorin, i cili shuan çdo dyshim dhe përjashton drejtpërdrejt numrin 10 bardhezi. Formacioni i Kontes shfrytëzon superioritetin numerik dhe në të 44-ën thyen "murin" friulian, me Godinin që kroson për Sensin dhe mesfushori me kokë e dërgon topin në rrjetë.
DEBUTIMI I SANÇEZIT
Me rikthimin në fushë, Konte nuk kërkon lëvizje të rrezikshme dhe nxjerr Barelën për ta zëvendësuar me Galjardinin. Pa asnjë ndërrim taktik nga të dyja skuadrat, ndonëse bardhezinjtë ishin me një vetë më pak. Madje, ekipi i Maranit shfaqet më i bindur në gjysmëfushën rivale dhe në të 52-ën Lazanja i reziston markimit të Godinit, koordinohet mirë për goditjen, por Handanoviç si zakonisht
ndërhyn me vendosmëri dhe devijon në këndore. Me një lojtar më shumë, Interi mundohet të arkivojë fitoren. Në minutën 57 Politano i shkon pranë golit të dytë, vetëm se reflekset e Musos ia mohojnë. Tri minuta më vonë, Galjardini provon goditjen surprizë,
por mbrojtësi ekstrem i miqve nuk humbet përqendrimin dhe dërgon topin mbi tra. Në fund, Politano i lë vendin Sançezit për debutimin e kilianit, i cili përpara përfundimit ndalet nga Muso. Rezultati nuk ndryshon, Interi i Kontes fiton sërish.