Liverpuli merr arratinë, Siti e sheh me dylbi
Magjistari Firmino ndihmon në marshimin perfekt, humbet Pep Junajtid buzëqesh me Rashfordin, “baby” Çelsi fabrikon 5 gola
Liverpuli bën pesë. Jo gola, por fitore në po kaq javë të Premier Ligës dhe vazhdon ta udhëheqë kampionatin me pikë të plota, duke i parë të gjithë nga sipër. Një e djathtë fantastike e Vilems trembi “Anfield” në minutën e shtatë, por dopieta e Manesë riktheu kampionët e Europës në avantazh që në pjesën e parë ndaj Njukasëllit. Salah mbylli llogaritë me një gol “Play Station” për meritë të asistit gjenial të Firminos me thembër. Skuadra e Klopit mbërrin në mënyrën më të mirë të mundshme në takimin e parë të Champions-it kundër Napolit, ndërsa tekniku gjerman qan vetëm dëmtimin e Origit. Skuadra e Stiv Brusit u tregua e zonja, duke i goditur shpejt të kuqtë me diagonalen e Vilemsit, e cila u ndal në trekëndësh. Por pastaj erdhi dopieta e Manesë (28’ dhe 40’) dhe mbyllja e llogarive nga Salah në 72’, pasi finalizoi trekëndëshin me Firminon. Braziliani e nisi nga stoli, por hyri në fushë në të 37’ pas dëmtimit të Origit. Dhe është njeriu që bën diferencën në fushë, veçanërisht me prekjen me thembër me të majtën dhe asistin me të djathtën: një numër nga ato të shkollës së vjetër braziliane. Edhe goli i 2-1 i Manesë u frymëzua sërish prej tij. Morali: fitorja e 14-të radhazi në Premier Ligë për skuadrën e Klopit, që vazhdon të thellojë rekordin e klubit dhe ndeshja e 43-të në “Anfield” pa humbje. Napoli është i paralajmëruar.
GAFË E SITIT – Humbja e parë e kampionëve të Anglisë në Premier Ligë vjen në shtëpinë e Noruiçit. “Kanarinat” ndëshkojnë gabimet e mbrojtjes së Guardiolës. Në “Carrow Road”, skuadra e Farkes e sheh veten në avantazh 2-0 në më pak se gjysmë ore falë golave të MekLin dhe Kantuell. Aguero rihap ndeshjen përpara pushimit, por Puki përfiton nga një gafë e Otamendit dhe shënon golin e tretë. Goli i Rodrit në 88’ nuk mjafton. Tani Pep e shikon Klopin 5 pikë larg.
TËRBOHET ÇELSI – Pastaj është radha e shiut të golave të ndeshjeve të orës 16:00. Njëri prej tyre mban firmën e Patrik Kutrones, me një prekje nga pak metra që shkurtoi në 2-4 rezultatin për Uolvesin ndaj Çelsit. Blutë e Londrës shënuan 4 gola me njeriun e momentit, Abraham (njëri në portën e tij), ndërsa Maunt mbylli goleadën e nisur nga goli spektakolar i Tomorit. Shënojnë të gjithë lojtarët e akademisë dhe Lampard nis të korrë
frytet e talenteve të tij. Blutë po ngjiten, por mbeten ende -7 nga kreu.
JUNAJTID – Në kuotën e 8 pikëve, së bashku me Çelsin janë edhe Totenhemi, Mançester Junajtid dhe Lestëri. “Djajtë e kuq” mposhtin “dhelprat” në shtëpi falë një goli me penallti të Rashfordit në minutën e 8-të. Ndërsa Spërsat dhurojnë spektakël në derbin ndaj Kristal Palasit me golat që i shënojnë të gjithë në pjesën e parë. Dopietë spektakolare e Sonit (10’, 23’), që i shtohet edhe goli i Lamelës (42’) dhe autogoli i Van Anholt (21’).