Benzema nderon Realin, Barcelona bën “manita”
Francezi u jep triumfin madrilenëve, por sa shumë vuajtje Nga 3-0 në 3-2, Eden Hazard debuton me fanellën “galaktike”
Në pritje të shkëlqim it të Eden Hazardit, ky Real është i Karim Benzemasë. Belgu më në fund debutoi ditën e djeshme (bashkë me Militaon), por ndeshja ishte e francezit me 2 gola, një shtyllë dhe duartrokitje të panumërta nga tifozët e pranishëm në “Bernabeu”. Skuadra e Zidanit fitoi 3-2 kundër Levantes, duke treguar lojë të bukur në aspektin sulmues, me tre gola, raste të pafundme dhe ndërhyrje të jashtëzakonshme të portierit Aitor Fernandez. Por, gabimet në mbrojtje janë trashanike dhe e lejuan ekipin nga Valencia që nga 3-0 ta mbyllte ndeshjen 3-2 dhe t’i shkonte pranë barazimit në shtesë. Në Paris, Reali duhet të tregohet më solid në mbrojtje.
SUPER-KARIM - Zinedin Zidan ishte pa Bejlin e skualifikuar dhe me një listë të gjatë dëmtimesh si Asensio, Modriç, Isko dhe Valverde. Mesfusha ishte për t’u ribërë dhe francezi e zbret ekipin me skemën 4-2-3-1, ku Kros dhe Kasemiro qëndronin përpara mbrojtjes, ndërsa Vaskez, Hames dhe Vinicius në mbështetje të Benzemasë. Francezi bën çfarë të dojë, falë kualitetit që ka në këmbët e tij. Nëse duhet të ndihmojë shokët është perfekt, nëse duhet të bëjë bomberin nuk ka probleme. Goli i parë vjen pas një krosimi perfekt nga Karvahal dhe francezi kërcen mbi të gjithë, duke e dërguar në rrjetë. Nisja e ndeshjes të jep idenë e një goleade, ku sërish francezi dhe më pas Kasemiro i dërgojnë shifrat në 3-0. Reali dominoi totalisht këtë fraksion, teksa më parë Lukas Vaskez kishte goditur edhe shtyllën.
DEBUTON HAZARD - Reali i Madridit u relaksua në fillimin e pjesës së dytë dhe pas 4 minutash, Borha Majoral i ndëshkon, por nuk feston. Benzema pak minuta më vonë godet
sërish shtyllën. Goli i Levantes nuk e shqetëson Zidanin, i cili vazhdon sipas planit për t’u dhuruar debutimin Hazardit dhe Militaos në vend të Kasemiros dhe Ramosit. Zizu rindërtoi skuadrën me Krosin përpara mbrojtjes me treshen e sulmit Vinicius-Benzema-Hazard, duke u dhënë lirshmëri Hamesit dhe Marselos. Portieri Aitor Fernandez ishte spektakolar në të paktën 3 raste dhe Levante gjen golin e dytë pas një goditjeje këndi me Meleron, i cili përfiton nga mungesa e vëmendjes së Karvahalit. Reali e humbi toruan në minutat e fundit të ndeshjes dhe në shtesë, Kurtua duhet të bënte një mrekulli, pasi Ruben Vezo goditi me kokë. “Bernabeu” u nervozua për këto minuta dhe për faktin që ndeshja kaloi nga 3-0 në 3-2. Zidan ka ende shumë punë në aspektin mbrojtës.