Luftëtari, “mat” me Filin vlonjatëve
Dopietë e sulmuesit fierak, trajneri grek debuton me fitore Flamurtari në “koma”, goli i parë i Vatnikajt si ngushëllim
Luftëtari kap “mat” me Fil(in) si në një lëvizje shahu Flamurtarin. Më në fund, pas katër javësh kampionat, gjirokastritët kanë arritur fitoren e parë, duke gëzuar tifozët dhe drejtuesit pas atij starti me tri humbje radhazi. Në fakt, në edicionin e kaluar, bluzinjtë kanë qenë edhe më keq, pasi fillimisht pësuan katër humbje në po kaq javë në start dhe më pas gjetën fitoren. Dje kundër Flamurtarit, protagonist absolut u bë pa dyshim sulmuesi fierak, Realdo Fili, i cili shënoi dy gola, duke u dhënë tri pikë të arta gjirokastritëve. Nga ana tjetër, Flamurtari u zhyt edhe më keq në krizë, duke konfirmuar në transfertën ndaj bluzinjve se ka vërtet probleme të mëdha. Luftëtari e meritoi plotësisht fitoren, madje mund të kishte shënuar më shumë gola nëse Fili, Renja, Oshafi dhe Ziaji do të ishin më të qartë para portës.
PJESA E PARË - Në debutimin e tij në pankinën bluzi, trajneri grek Jorgos Marantas kishte bërë disa ndryshime në krahasim me Klodian Duron. Në qendër të mbrojtjes luanin Demo dhe Lala, ndërsa në krahun e majtë, kapiteni Rapo. Edhe sulmi kishte risi, pasi vepronte katërshja: Ziaji dhe Renja nga krahët dhe Fili pas sulmuesit kryesor, Oshafit. Që në start është Renja që jep sinjalin e parë, ndërsa më pas qendërmbrojtësi Lala nuk gjen shënjestrën pas goditjes me kokë. Gjirokastritët janë më kërkues, ndërsa Flamurtari qëndron në gjysmëfushën e vetë. Në majën e sulmit vlonjat luante për herë të parë këtë sezon Xhevahir Sukaj, por dukshëm me gjendje jo të mirë fizike dhe aspak i rrezikshëm për mbrojtësit bluzinj. Renja ka një mundësi të artë, por përballë Moçkës nuk ka shënjestrën e duhur. Më pas është sulmuesi gjirokastrit, Ardit Ziaji, i cili i rikthyer pas një sezoni te Flamurtari, nuk arrin të mposhtë Moçkën. Pjesa e parë mbyllet 0-0.
PJESA E DYTË - Pas pushimit gjirokastritët e nisën në sulm, pikërisht aty ku e lanë. Fili del i vetëm me portierin, por Moçka mban në lojë vlonjatët duke evituar një gol të sigurt. Por nuk vonon shumë dhe një duel në zonë mes Deliajt e Oshafit detyron arbitrin Sino të akordojë 11-metërsh për Luftëtarin. Nga pika e bardhë është Fili që kalon në avantazh bluzinjtë dhe 1-0. Menjëherë trajneri i Flamurtarit, Dritan Sadedini, bën dy lëvizje, duke
hedhur në fushë Vatnikajn dhe Çelajn. Të dy rezultojnë efikas, pasi bëhen rreziku kryesor në portën vendëse. Elian Çelaj, një ish-lojtar i Luftëtarit në sezonin e kaluar, me lëvizjet e tij nxjerr në pozicione shënimi. Në të vetmin moment kur mbrojtja bluzi nuk është e pozicionuar mirë, vlonjatët godasin me Vatnikajn, që kërcen bukur në zonë dhe barazon. Flamurtari merr zemër, ndërsa Luftëtari kalon minuta paniku. Megjithatë, kur mendohej se gjithçka u mbyll 1-1, klasi i Filit u dhuroi fitoren e parë bluzinjve.