Lushnja dhe Apolonia, “zjarr” që në start
Kategoria e Parë nis me goleada, fitojnë edhe Besëlidhja me Kastriotin
Apolonia e nis me këmbën e mbarë kampionatin, duke marrë tri pikë në një transfertë të vështirë si ajo e Elbasanit. Fierakëve u ka mjaftuar një gol i mbrojtësit Nako në pjesën e parë për të marrë fitoren dhe bërë detyrën, ndërkohë që Elbasani del duarbosh nga "Elbasan Arena", edhe pse me pak fat mund të merrte...
Lushnja e nisi kampi onatin në shtëpi, por me dyer të mbyllura. Gjithsesi, mungesa e tifozëve nuk e pengoi skuadrën e drejtuar nga trajneri Ilir Gjyla ta niste me një “poker” golash garën, duke u dhënë një mesazh të qartë rivalëve. E nisi Canka dhe e përfundoi Sefa, dy goleadorët e Lushnjës, ndërkohë që shënuan edhe Ruço e Baze. Në mes kishte një penallti-gol të kapitenit të Shënkollit Danaj, të dhënë për “qejf” nga gjyqtari Muska. Shkallë të boshatisura dhe temperatura të larta. Ndeshja nis e qetë dhe Lushnja përpiqet të ngacmonte nga pak. Në minutën e 16-të vjen momenti i parë që u takon miqve. Kapiteni Ruben Danaj vepron bukur në të djathtë dhe nxjerr të lirë në qendër Grudën, i cili është i vetëm me Haremin, por goditja e sulmuesit të Shënkollit
pritet nga portieri lushnjar. Ka më shumë se një mundësi për Shënkollin që të marrë avantazhin. Ibrahimllari komplikon situatën me një pasim drejt Haremit që korrigjon shokun. Lushnja është me fat në minutën e 22-të, kur kapiteni Danaj çan sërish në qendër, por përballë Haremit godet shtyllën. Më pas vjen reagimi i Lushnjës. Redon Danaj bën “portierin” në një gjuajtje të Sulkjes, ndërsa në minutën e 36-të Cankës i vjen topi me “porosi” brenda zonës, një goditje mjeshtërore dhe 1-0.
Pjesa e dytë është spektakolare për Lushnjën, që pas pushimit është krejt tjetër skuadër, duke bërë volum të madh loje dhe duke krijuar raste pafundësisht. Që në fillim Sulkja me kokë mund të dyfishonte. Në minutën e 55të, Ruço me një gjuajte nga jashtë zonës, shënon një gol spektakolar. Rezultati shkon 2-0 dhe vetëm pas 5 minutash ka penallti për Shënkollin. Kapiteni Ruben Danaj është i saktë dhe ndeshja rihapet, por luhet vetëm me një portë. Sefa dy herë me kokë nuk gjen kuadratin dhe vjen minuta e 70-të, kur Baze shënon golin e tretë me një gjuajtje brenda zonës. Në minutën e 82-të, Sefa devijon saktë me kokë një kros të përpiktë të Mones dhe Lushnja shënon golin e katërt. Një fund, Ervis Gjyla mund të kishte shënuar golin e pestë, por nuk gjen kuadratin. Lushnja merr tri pikë që në start dhe karikohet edhe më shumë para derbit me Apoloninë.