“Frikë për jetën e zhvatje”, Takaj: Si na shantazhuan
Djali i presidentit në Austri: E përdorin prej dënimit “Nuk e njohim Kuljiçin, ai erdhi në ‘Tropikal Resort’”
Akuzat ndaj të atit e kanë bërë djalin e presidentit të Skënderbeut që të deklarojë në Austri se ata ndihen tashmë të rrezikuar me jetë. Gerhard Takaj është intervistuar nga gazeta austriake në prani të ish-sulmuesit të Vllaznisë, Roland Luçi, teksa ka dhënë fakte për austriakun që doli publikisht me akuza kundrejt presidentit të Skënderbeut. “Ne jemi të frikësuar për jetën, pasi nuk e dimë se çfarë është i aftë Kuljiç dhe njerëzit pas tij që të bëjnë”, është shprehur fillimisht Takaj Xhunior, siç edhe prezantohet nga media austriake “Krone”.
AKUZAT - Ish-futbollisti austriak, i cili ka vuajtur edhe dënimin prej pesë vitesh burgim me akuzën e manipulimit të ndeshjeve, ka akuzuar ndër të tjera se është kërcënuar, teksa ka adresuar deklaratat e tij në kupolën drejtuese të Skënderbeut, edhe pa i përmendur emrin Ardian Takajt, por duke e personifikuar vetëm si presidenti i Skënderbeut. “Nuk e njohim fare se kush është ai njeri”, është shprehur Gerhard Takaj për gazetarin austriak.
FRIKA E TAKAJT - Gjatë intervistës së dhënë në Austri, i biri është shprehur se babai i tij, presidenti i korçarëve, ndihet i frikësuar për jetën. “Babai im është i frikësuar, ndihet i pasigurt për jetën dhe sigurinë e tij. Kush e di se çfarë njerëzish të tjerë si Kuljiç, që bën të tilla pohime, ka të përfshirë dhe çfarë janë të aftë që të bëjnë”, është shprehur Gerhard Takaj në median austriake, e cila më tej nënvizon se ai ka mohuar kategorikisht që i ati të ketë njohje me këtë person.
ZHVATJA - I biri i Ardian Takajt është munduar që të bëjë një lloj lidhjeje logjike se çfarë mund të fshihet pas gjithë këtij procesi. Në bisedën me gazetarin austriak nënvizohet se Ardian Takaj është presidenti i Skënderbeut për 8 vite, i shpallur radhazi kampion në vendin tonë. Referuar dënimit nga UEFA me një gjobë prej 1 milion euro dhe mospjesëmarrje në kompeticionet e UEFA-s për 10 vite, Takaj pretendon se kjo çështje po shfrytëzohet për të përfituar prej ekipit korçar. “As në atë periudhë kur na ndëshkoi UEFA nuk pati hetime. As marrje të dëshmive. Kuljiç e di që ne jemi duke e luftuar akoma vendimin e UEFA-s. Jo vetëm kaq, por ai e di edhe që çdo përmendje negative e emrit tonë, është në dëmin tonë. Ai dhe të tjerët pas tij duan që ta përdorin këtë
metodë për të zhvatur para nga ne. Për këtë ne do të flasim me avokatët në Austri, pasi duam që të ngremë një padi për zhvatje dhe për shpifje”, ka treguar Gerhard Takaj.
VIDEO- Pasi Kuljiç ka akuzuar se ka frikë për jetën, Gerhard Takaj u ka dhënë austriakëve videon teksa austriaku ka qenë në “Tropikal”, hotelin në pronësi të Ardian Takajt. “Kush duhet të ketë frikë për jetën? Ai që shfaqet në hotelin e presidentit që po akuzon? Është krejtësisht qesharake”, ka përfunduar Gerhard Takaj.