Pakult: S’kam dëgjuar për trukime, futbollistët nuk paralajmërohen
Ish-trajneri i Kukësit, austriaku: Punohet në qetësi
Akuza në drejtim të presidentit të Skënderbeut është një nga temat më të diskutuara kohët e fundit. Jo vetëm në vendin tonë, por sidomos në Austri, ku edhe ka dalë personi që ka drejtuar gishtin e akuzave drejt ekipit shqiptar dhe krerëve të tij. Si për të vijuar shpjegimin se çfarë ndodh në futbollin shqiptar dhe në ekipet tona, në mediat austriake ka një ish-trajner, i cili e ka prekur vetë nga afër lojën dhe çfarë ndodh në Shqipëri. Ai është Peter Pakult, i cili ka luftuar pikërisht me Skënderbeun në periudhën kur drejtonte skuadrën verilindore të Kukësit, teksa ka nënvizuar se nuk ka parë bosë të mafies së trukimeve në vendin tonë, por gjithashtu ka theksuar se futbollistët nuk paralajmërohen për rrezikun e trukimeve. Sipas Pakultit, kjo nuk është aspak praktikë në Shqipëri.
Gazeta “Krone” ka intervistuar dje trajnerin Peter Pakult, i cili ka ushtruar profesionin e tij edhe në Shqipëri. 59-vjeçari ishte nën drejtimin e Kukësit nga janari i 2018-ës me skuadrën veriore, që zhvilloi 23 ndeshje nën drejtimin e austriakut deri në verë.
Gjatë intervistës, për ish-trajnerin e skuadrës verilindore pyetja ka qenë e drejtpërdrejtë nëse ka dhe çfarë ndodh me manipulimin e ndeshjeve në Shqipëri. Referuar kësaj pyetjeje, Pakult i është përgjigjur: “Kur shkova në Shqipëri, kuptova që Skënderbeu ishte dënuar për këtë. Ne nuk e dinim për cilat ndeshje bëhej fjalë. Ndryshe nga Austria, lojtarët në Shqipëri nuk paralajmërohen në stërvitje për këto. Asnjëherë nuk më është kërkuar të bëj diçka të tillë”, ka deklaruar Pakult.
Ai ka komentuar edhe raportin që ndërtohet këtu në Shqipëri me presidentët e klubeve. “Atje funksionon si në çdo vend në Ballkan, presidentët nervozohen shpejt. Kam punuar normalisht në atë vend për gjysmë viti, por nuk pashë mafia”, është shprehur Pakult.
SHQIPËRIA
Më tej, austriaku ka rrëfyer në mediat e vendit të tij se çfarë ndodh në Shqipëri, si është pagesa për futbollistët dhe se si është vendi apo si janë njerëzit në raport me të huajt. “Vendi atje është me të vërtetë shumë i varfër. Lojtarët fitojnë aq sa fitojnë futbollistët që aktivizohen në Ligën e Dytë austriake. Mirëpo, njerëzit janë miqësorë. Unë kam qenë në gjendje të punoj atje normalisht. Nuk kishte lidhje me manipulimin”, ka deklaruar për “Krone”, austriaku Peter Pakult.