Duro: Kukësi, ia del në Ballsh
Trajneri: Kemi mungesa të rëndësishme, por pres maksimumin nga ekipi ndaj Bylisit "Dihet se cilët janë pretendentët për titull, por rrugës mund të ndryshojë situata"
Trajneri Shpëtim Duro e mori me vonesë drejtimin e Kukësit, ndaj me një muaj përgatitje ai arriti që të maksimizonte idetë e tij në lidhje me ekipin. Futbollistët e kuptuan dhe iu përshtatën atij e tashmë Kukësi duket se ka një fizionomi, atë të Shpëtim Duros. Edhe pse te verilindorët pati shumë hyrje-dalje, lojtarëve të rinj si Musta, Obanor, Gavazaj, ai u gjeti vendin e duhur, pa harruar ata që gjeti, si Valon Ethemi, Vesel Limaj, Edis Maliqi dhe Vasil Shkurtaj. Kukësi është kolauduar dhe ka marrë rezultate pozitive, duke zhvilluar edhe lojëra interesante. Trajneri Duro kërkon ta ruajë ecurinë, edhe pse sot ka përballë një skuadër për t'u vlerësuar, si Bylisi. Në një intervistë për "Panorama Sport", 59-vjeçari komenton ndërprerjen e kampionatit, e cila i ka bërë mirë ekipit, por disa dëmtime i kanë hapur punë. Gjithsesi, Duro ka besim te ekipi. Sa për garën, ai thekson se është vetëm fillimi, por Partizani dhe Kukësi janë dy rivalët kryesorë.
Sa ju ka shërbyer kjo pauzë e kampionatit, ka ndikuar për mirë apo për keq në skuadër?
Sigurisht që kjo periudhë pushimi na ka shërbyer duke pasur parasysh që kemi zhvilluar 4 ndeshje në një periudhë shumë të shkurtër 12ditore, dhe në këtë kuadër ky pushim ishte shumë i domosdoshëm, si fizikisht ashtu dhe psikologjikisht. Por, krahas këtyre kemi pasur dhe disa probleme me 2-3 lojtarë, por gjithsesi ishte një periudhë që na shërbeu pozitivisht.
Çfarë ndeshjeje prisni në Ballsh dhe a mund të themi se fitorja është detyrim në këtë transfertë?
Patjetër që ndeshja e Ballshit, si çdo sfidë tjetër e kampionatit, është e rëndësishme, sepse është një betejë
e një lufte gjatë gjithë zhvillimit të kampionatit. Kemi kundërshtar një skuadër të fortë, e ndërtuar mirë, e jo rastësisht ndeshjen e fundit e fitoi 3-0 me një kundërshtar si Skënderbeu. Pres të zhvillohet një ndeshje e bukur nga të dyja skuadrat, ku ne do të mundohemi të marrim maksimumin.
Ka diçka që ju shqetëson para kësaj ndeshjeje?
E thashë dhe më lart që kemi shqetësime, gjatë kësaj periudhe ishin të paparashikuara. Janë tre lojtarët që nuk janë të gatshëm për këtë takim. Janë dy futbollistë që
kanë qenë shumë në formë në fillim të kampionatit, Valon Ethemi dhe Emiljano Musta, të cilët kanë dëmtime të trashëguara dhe do t'u duhen 2-3 javë që të rikuperohen. Kanë luajtur të sforcuar me shqetësimet përkatëse. Natyrisht që kemi dhe Teqjen, i cili është dënuar nga Komisioni i Disiplinës me dy ndeshje. Janë mungesa të cilat natyrisht do të na vlenin shumë, por futbolli ky është. Unë pres shumë nga ata që do të zëvendësojnë këta lojtarë. Kam besim te të gjithë çunat në ekip. Jam i bindur që secili do japë më të mirën e
vet.
Na jepni disa arsye pse Kukësi juaj është më i fortë se Partizani dhe rivalët e tjerë në garën për titull?
Kampionati sapo ka filluar. Nuk mund të dalin pretendimet se kush është më i fortë në tri javët e para. Kampionati është i gjatë, do seriozitet, do përqendrim çdo javë. Sigurisht që Partizani, Kukësi, të cilët kanë qenë protagonistë prej vitesh, apo Tirana, Teuta e ndonjë skuadër tjetër që mund të korrigjohet rrugës do të jenë në luftë për objektivat e tyre gjatë kampionatit.