Derbi është i Devollit, Pogradeci në tapet
Devolli-Pogradeci ishte tamam një derbi, një takim i fortë dhe i bukur që në fillim nga të dyja ekipet, që e kërkuan me ngulm golin e avantazhit. Rastin e parë e kanë vendësit, në minutën e 15-të, kur braziliani Mota godet pas një daljeje të portierit kundërshtar, por largojnë rrezikun mbrojtësit e Pogradecit. Miqtë mbrohen me shumë kujdes deri në minutën e 28-të, kur Rapo gjen rrjetën dhe entuziazmon tifozët e pranishëm në stadium. Pas pësimit të golit, pogradecarët fitojnë një goditje dënimi që e ekzekuton Jahaj, por topi pritet me mjeshtëri nga portieri Mali. Më pas janë sërish devollinjtë që mund të shënojnë edhe golin e dytë me anë të Avdillarit, por pa rezultat në këtë rast. Në minutën e 35-të, Pogradeci kërkon një faull brenda zonës, pas një roveshate të Nallbatit, kurse Liçkollari rrezikon përsëri për miqtë, por pa mundur të shënojë.
Në pjesën e dytë, ekipi i Pogradecit kërkon golin e barazimit, duke luajtur fort deri në minutën e 60-të, por ishte futbollisti Mota ai që shënoi golin e dytë për Devollin, pas një aksioni perfekt të skuadrës së tij. Në këtë moment Pogradeci dorëzohet plotësisht dhe e detyron teknikun Abazaj të kryejë tri ndërrime brenda pak minutash. Futbollistët e Devollit, pavarësisht avantazhit të dy golave, luajnë sërish në sulm dhe arrijnë të shënojnë edhe golin e tretë me anë të lojtarit më të shpejtë të ekipit, Klejdi Rapos. Edhe gjatë minutave të mbetura loja është e bukur, por nuk sjell gola të tjerë. Devolli fiton bindshëm derbin, mbi të gjitha me lojë të mirë. Pas përfundimit të ndeshjes, trajneri i Pogradecit, Ardjan Abazaj, ishte shumë i mërzitur e nervoz dhe nuk pranoi të prononcohej. Sigurisht, ai nuk e priste një humbje të thellë në fushën e një ekipi që vjen nga një kategori më poshtë.