Kastrioti vuan me Egnatian, e shpëton një penallti në fund
Në “Redi Maloku” ndodhin nga të gjitha
Kastrioti vuan, por në fund ia del që të marrë tri pikë të arta në përballjen e parë. Krutanët pritën dje në “Redi Maloku” Egnatian, skuadër e cila i hapi shumë punë Kastriotit të Ramadan Ndreut. Edhe pse me 10 lojtarë, ekipi rrogozhinas rezistoi deri në fund. Ishte një pjesë e parë e vakët, me raste sporadike, por një pjesë e dytë që dhuroi plot pesë gola. Për krutanët fillimisht shënoi Ajazi, ndërsa Taulant Marku dyfishoi rezultatin në minutën e 71-të. Pasi e çuan rezultatin në 2-0, krutanët kaluan në aventurë dhe e menduan të mbyllur ndeshjen, por miqtë e rihapën sfidën. Ishte fillimisht Gjoka që ngushtoi shifrat në 2-1, pas një daljeje të gabuar të portierit Selaci, ndërsa Doksani pas një gafe të mbrojtjes barazon përkohësisht. Një penallti në fund të sfidës nderon Kastriotin. Basha pengohet në zonë dhe për kryesorin Kaimi ka 11-metërsh. Ka protesta nga miqtë, mirëpo vendimi është i pakthyeshëm. Ekzekutimin e merr përsipër mesfushori shkodran, Abaz Karakaçi, i cili nuk gabon dhe shënon për 3-2.
- Edhe pse kishin një faull në favor të tyre, Bilali për shkak se protestoi gjatë
te kryesori, me pretendimin që duhet të kishte dhënë karton të kuq për lojtarin e Kastriotit, penalizon veten e tij. Protestat e gjata dhe ofendimet në drejtim të arbitrit e detyrojnë këtë të fundit ta ndëshkojë me të kuqe lojtarin e Egnatias. Në këtë mënyrë,
miqtë mbetën me dhjetë lojtarë që në minutën e 15-të. Pavarësisht se po luante me një lojtar më pak, rrogozhinasit zhvillojnë një lojë dinjitoze, paçka se humbën në limite. Reagimi i tyre në minutat 82 dhe 87 ishte vërtet mbresëlënës.