Ikardi debuton me PSG-në, Nejmar kryevepër në 92' mes koreve “bir k...”
Ish-interist luajti 30', ylli brazilian e pranon: Po, doja të ikja!
Mjafton një magji e Nejmarit në minutën e 92-të, që PSG-ja ta bëjë fitues debutimin e Mauro Ikardit me fanellën e kampionëve të Francës: 1-0 me shumë vështirësi ndaj Strasburgut në "Parc des Princes" me golin e yllit brazilian, që vërshëllimave të stadiumit të tij dhe koreve "Nejmar bir k..", pasi kërkoi të rikthehej drejt Barcelonës në verë, iu përgjigj me një kryevepër në sekondat e fundit të ndeshjes. Nga ana tjetër, sulmuesi argjentinas, i cili mendohej se do të ishte titullar, e shikon pjesën e parë të ndeshjes nga stoli, duke hyrë vetëm në minutën e 62-të. Në sulm, pa Mbapenë dhe Kavanin, Tuhel zgjodhi Çupo-Moting në qendër. Në 38', ish-sulmuesi i Interit u ngrit në nxemje për të zëvendësuar këtë të fundit, që mbeti në tokë pas një përplasjeje, por gjermani mund të vazhdojë dhe Maurito rikthehet në vendin e tij. Në pjesën e dytë, me rezultatin e frenuar në 0-0, vjen momenti i debutimit me Vandën që filmonte gjithçka në telefonin e saj. Në 68', Nejmar i shërben një top që ai nuk e arrin, ndërsa në 81' merr një top të artë që nuk shkon në portë vetëm prej ndërhyrjes së Konesë. Por në minutën e 92-të, është pikërisht Ikardi ai që fton Dialonë në krah të majtë për të krosuar për Nejmarin, i cili me një roveshatë fantastike nuk i lë asnjë shans portierit (topi fillimisht prek shtyllën, pastaj ndalet në rrjetë). Ka kohë edhe për një gol të dytë të brazilianit, por në momentin që Ikardi nis Di Marian në kundërsulm, argjentinasi është në pozicion jashtë loje dhe VAR-i anulon festën. FLET NEJMARI - Pasi ka vendosur që të qëndrojë, ndoshta edhe vetëm për një sezon tjetër, Nejmar, i cili vendosi edhe ndeshjen me Strasburgun me një roveshatë, pranon bisedimet me Barcelonën, por në të njëjtën kohë edhe se është i fokusuar totalisht te PSG-ja. "Nuk ia kam fshehur askujt se doja të largohesha, të gjithë e dinë këtë dhe po e pranoj sërish. Nuk dua të flas për detajet e bisedimeve, por mbi të gjitha nuk kam asgjë kundër PSG-së dhe tifozëve të këtij klubi. Nëse nuk ndihesh i lumtur në vendin tënd të punës është normale të kërkosh një sistemim tjetër. Kisha arsyet e mia për t'u larguar, por fatkeqësisht nuk ma lejuan. Gjithsesi, tani që jam ende këtu do të fokusohem 100 për qind që të ndihmoj PSG-në".