Zidan: Pësojmë shumë gola, ja çfarë na mungon për të shkëlqyer
Zinedin Zidan është i kënaqur vetëm me rezultatin, por edhe me 45 minutat e para të Realit të Madridit kundër Levantes. Trajneri francez thotë se ekipi duhet të mësohet që të luajë mirë për një kohë të gjatë dhe jo të futet në pjesën e dytë, duke e menduar ndeshjen të fituar. Ai i thuri elozhe Benzemasë dhe Hamesit, ndërsa theksoi se Vinicius dhe Hazard duhet të përmirësohen akoma më shumë.
VUAJTJE - “Problemi është që në pjesën e dytë nuk u futëm të bindur në fushë dhe ata shënuan menjëherë. Dua të mbetem më shumë te pjesa e parë, e cila ishte shumë e mirë. Bëmë një lojë të shkëlqyer, shënuam gola dhe patëm raste. Edhe në të dytën patëm, por nuk i konkretizuam. E merituam këtë fitore, por duhet që të përmirësohemi për të bërë 90 minuta të mira dhe jo vetëm 45. Nëse për një pjesë bëjmë lojë të shkëlqyer, sigurisht që mund ta bëjmë edhe për 90 minuta”.
CHAMPIONS - “Nuk menduam aspak për ndeshjen e ardhshme. E rëndësishme ishte që të fitonim sot (dje). Menduam vetëm për Levanten”.
HAMES - “Ishte shumë mirë dhe komod. Kur ka topin në këmbë, është i shkëlqyer, pastaj fizikisht humbi energjitë, sepse ishte i dëmtuar. Më pëlqen fakti që është i motivuar. Donte patjetër që të shënonte. Ai ka pasur dhe vazhdon të ketë kualitet. Nuk ka ndryshuar asgjë me Hamesin e mëparshëm. E mbylli ndeshjen pa pikë energjie dhe kjo më pëlqen”.
HAZARD - “Jam duke i menaxhuar mirë lojtarët që nuk janë në 100% të formës. Ata janë përgatitur shumë pak. Hazard do të përmirësohet shumë. Shpresoj që të mos kemi shumë dëmtime në të ardhmen. Eden ka bërë vetëm 4 stërvitje, por është një lojtar shumë vertikal dhe do të na ndihmojë”.
ÇFARË MUNGON - “Vazhdimësia. Duhet të luajmë mirë për një kohë të gjatë dhe këtë e dimë të gjithë. Në këtë aspekt do të punojmë në të ardhmen. Gjithashtu, nuk duhet të pësojmë kaq shumë gola”.
VINICIUS - “Është vetëm 18 vjeç dhe i duhet kohë për t’u rritur si lojtar. E rëndësishme është që krijon raste, por do të vijë edhe momenti kur këto raste do t’i dërgojë në portë”.
BENZEMA - “Prej kohësh kam dëgjuar se kjo ishte ndeshja më e mirë e Benzemasë. Në fakt, ai është gjithmonë aty, duke na ndihmuar dhe duke bërë maksimumin”.