Shumë zhurmë për 1 pikë, Levandovski s'i mjafton Bajernit

Ngecin bavarezët, Lajpcigu reziston dhe ruan kreun Një penallti e Forsbergut zhvlerëson golin e polakut

Lajpcigu reziston dhe konfirmohet i pari, ndërsa Bajerni i Mynihut e sheh veten që të parakalohet edhe nga Dortmundi, duke qëndruar dy pikë larg kreut. Përfundon 1-1 me gol të Levandovskit në minutën e tretë, ndërsa Forsberg barazon me penallti në minutën e tretë shtesë të pjesës së parë. Trajneri Kovaç, ashtu siç pritej, lë në stol blerjet e reja, Perisiç e Kutinjo, duke i dhënë hapësirë në sulm gardës së vjetër, Myler, Koman e Gnabri, pas shpatullave të Levandovskit. Kampionët e nisin menjëherë me vrull maksimal dhe kalojnë në avantazh pas vetëm tri xhirosh kronometri: Myler fiton duelin me Klostermanin dhe nis me një pasim në thellësi për Levandovskin, me polakun që nuk mund të falë përballë Gulacskit, duke festuar golin e shtatë pas 4 javëve të para. Kaq mjafton që bavarezët të marrin në dorë ndeshjen dhe janë ata që vendosin edhe ritmin në fushë, duke i shkuar shumë pranë dyfishimit brenda tri minutash, sërish me Levandovskin mes minutave 12 dhe 15, por fillimisht e majta dhe më pas goditja me kokë nuk kanë precizionin e duhur për t'u devijuar në rrjetë. Në të 37-ën, tjetër moment në favor të Bajernit, me arbitrin Shtegeman që tregon pikën e bardhë të penalltisë në favor të Bajernit, për një kontakt mes Batcer dhe Hernandez, por pas reflektimit me pamjet e VAR-it, duke anuluar vendimin e tij të parë. Bajerni dominon, por nuk gjen goditjen fatale, diçka që i jep kurajë Lajpcigut, të cilët në minutën e 3-të shtesë shohin përpjekjet e tyre në sulm të vlerësohen: Hernandez rrëzon në zonë Poulsenin dhe penallti për të zotët e shtëpisë, të cilën Forsberg nuk mund ta gabojë. Në pjesën e dytë, në mënyrë të papritur, Bajerni bie fizikisht dhe i lejon

shumë fushë Lajpcigut, i cili kur niset në shpejtësi është vërtet i frikshëm, por në të 51-ën Nojer bën një mrekulli ndaj Mukieles. Kalon vetëm një minutë dhe është Koman që kundërpërgjigjet, teksa pas shpërthimit në shpejtësi pason në qendër për Levandovskin, por polaku nuk godet me forcë dhe goditja e tij ndalet në vijën fatale nga Konate. Takimi bie në "gjumë" për gati 20 minuta, por në tri të fundit të dyja skuadrat flirtojnë me tri pikët: në të 89-ën Verner godet në trup Nojerin në dalje, ndërsa në të 92-ën Zyle me koke sheh Gulacskin që të shndërrohet në superhero dhe devijon në shtyllë goditjen e gjigantit të mbrojtjes bavareze. Në fund, shumë zhurmë për një barazim, ndonëse, nëse Bajerni konfirmohet skuadra më e fortë edhe pse jashtë formës më të mirë fizike, Lajpcigu garanton se do të jetë forca e tretë e Bundesligës në këtë sezon.