Firmosi me Partizanin, 24-vjeçarja nga Ruanda: Gati për këtë aventurë
Mukandajisenga, e para ruandeze që luan jashtë kufijve
Partizani në volejboll për femra ka qenë skuadra më aktive në merkaton e transferimeve. Kampionet e Shqipërisë kanë ndërtuar një ekip solid, ku përveç objektivit për të fituar të gjithë trofetë kombëtarë, do të kërkojnë një paraqitje sa më pozitive edhe në Ligën e Kampionëve, aty ku shorti e ka vënë përballë ekipit nga Bosnje-Hercegovina, Zok Bimal Jedinstvo Brçko, me ndeshjet që do të zhvillohen më 9 tetor në Tiranë. Kushi, Picaku dhe Gjermeni janë përforcimet nga kampionati shqiptar, ndërsa nga merkatoja ndërkombëtare janë afruar sllovakja Hudekova, turkja Basha, amerikania Mans dhe ruandezja Benita Mukandajisenga. Kjo e fundit është futur në histori në Ruandë, duke u bërë lojtarja e parë nga ky shtet që transferohet jashtë kufijve. Në Ruandë e kanë pritur me shumë bujë kalimin e 24-vjeçares në radhët e Partizanit. Ndërkohë, Mukandajisenga duket shumë e lumtur për aventurën e saj në Shqipëri. Në një prononcim për gazetën "The New Times" në Ruandë deklaron: "Tani jam gati për këtë sfidë të re, ky është një kapitull i ri në karrierën time. Dua të mësoj sa të mundem dhe të kontribuoj në suksesin e klubit tim të ri", tha 24-vjeçarja, e cila aktivizohet në pozicionin numër katër dhe është e gjatë 1.84 metra. Ajo është lojtare e ekipit kombëtar të Ruandës, ndërkohë që në sezonin 20182019 u zgjodh MVP (lojtarja më e mirë e kampionatit). Mukandajisenga ishte vendimtare në shpalljen kampion të Universitetit të Turizmit, Teknologjisë dhe Studimeve të Biznesit, skuadër së cilës i mungonte titulli që prej vitit 2013. Kontrata e saj me Partizanin është njëvjeçare.