Vllaznia merr pikë me 10 lojtarë, Teuta pa shënjestër
Durrsakët nuk shkojnë më larg se barazimi, shkodranët rezistojnë edhe me 10 lojtarë Ekipi i Shkëmbit bën shumë pak për të pretenduar fitoren dhe humb kreun e renditjes
Nuk ka fitues në “Niko Dovana”, Teuta dhe Vllaznia e mbyllin 0 me 0. Një pikë që u vlen më shumë shkodranëve, pasi durrsakët me këtë ndalesë humbën edhe kreun. Ndonëse skuadra e drejtuar prej Bledi Shkëmbit e nisi me vrull lojën, nuk patën saktësinë e duhur në ato raste që krijuan. Kuqeblutë morën çka deshën në Durrës, u mbrojtën me forca të shumta dhe u munduan që me anë të ndonjë kundërsulmi sporadik të vinin në vështirësi vendësit. Dhe, në fakt, kjo gjë ndodhi vetëm në 65 minuta. U desh që të mbeteshin në inferioritet numerik, që ekipi i Mirsad Jonuz të kërcënonte për të parën dhe të vetmen herë portën e Frashërit.
PJESA E PARË
Teuta shfaqet kërkuese që në start, aq sa u krijua impresioni që ky takim do të fliste për ta. Pa kaluar 7 minuta, i vjen mundësia më e mirë për të zhbllokuar shifrat. Kalaja kroson nga goditja e këndit dhe topi shkon te këmbët e Arapit, por mbrojtësi gjendet i papërgatitur dhe nuk arrin as të gjuajë, ndonëse porta ishte e boshatisur. Vllaznia kishte “mision” të qartë: të mbrohej. Vendësit qarkullonin dendur topin dhe tentonin që të futeshin në zonën mike, por pa bërë çudira. Në të 27-ën Kalaja harkon nga e majta, por Nikaç dështon me kokë. E megjithatë topi shkon te Vecaj që provon me një kthesë, por Sherri nuk e ka të vështirë që të kontrollojë dhe i thotë “jo” golit. Loja përqendrohet në mesfushë, aq sa duhet të vinte e 41-ta që të shënohej një rast. E majta e Kuros gjen Nikaçin, por gjuajtja me kokë e malazezit pritet nga Sherri, i cili ruan rrjetën e paprekur. Kur u duk se historia e kësaj sfide ndryshoi, festa e durrsakëve mbeti në tentativë. Arapi shënoi në të 43-të, por anësori sinjalizon me të drejtë pozicion jashtë loje dhe për rrjedhojë pjesa e parë i dërgon ekipet në dhomat e zhveshjes me shifra të pandryshuara.
PJESA E DYTË Fraksioni i dytë nis si mos më keq për Vllazninë. Behar Ramadani mori të dytin e verdhë në minutën e 53-të dhe rrjedhimisht i la të tijtë me një lojtar më pak në fushë. Teuta mundohet të përfitojë dhe për këtë motiv Shkëmbi nisi që të bënte zëvendësime, duke tentuar medoemos golin e fitores. Por pa sukses. Edhe pse me 10 vetë, shkodranët “zgjohen” dhe për pak sa nuk bëjnë befasinë. Në të 65-ën e majta e brazilianit Hygor është e rrezikshme,
por Frashëri bëri detyrën në të vetmin rast që u vendos në provë. Durrsakët nuk pranojnë dot që të lënë dy pikë në shtëpi dhe sidomos pasi mësuan që Tirana bashkëkryesuese po fitonte, ndaj hidhen të gjithë në sulm. Në të 83-ën Kuro i jep një top
perfekt Nikaçit, por gjuajtja e malazezit me kokë lë për të dëshiruar, edhe pse në pozicion ideal goli. E njëjta situatë përsëritet në të 88-ën pas krosit të Todorovskit në zonë, por këtë herë ishte Khalid i futur nga stoli, që nuk gjeti dot kuadratin. Në të parën shtesë, nga
5 të akorduara, ka një përpjekje të dëshpëruar të Gurishtës me goditje dënimi, por shënjestra është e gjitha e gabuar. Minutat e mbetura nuk sjellin më asgjë, aq sa u krijuara përshtypja se ekipet ishin të kënaqura që po ndanin një pikë.