Ultimatum te Skënderbeu, Takaj kërkon tri fitore radhazi
Korçarët vijnë pas dy humbjeve radhazi në kampionat, presidenti i zhgënjyer
Humbja ndaj Tiranës ishte një goditje e rëndë për Skënderbeun, i cili nuk arriti dot të rikthehej te rezultatet pozitive edhe pas pushimit të kampionatit. Dy humbje radhazi, për një ekip si bardhekuqtë, nuk janë pak. Aq më tepër kur bëhet fjalë për një humbje si ajo në shtëpi ndaj Bylisit dhe më pas në transfertë ndaj Tiranës. Në kampin korçar, situata duket paksa shqetësuese, teksa veç lojës, në një pjesë të caktuar të ndeshjes nuk është treguar asgjë më shumë nga ekipi. Në të tilla kushte, presidenti i Skënderbeut, Ardjan Taklaj, ka kërkuar reflektim dhe më shumë përgjegjshmëri nga të tijtë në fushë, sidomos
nga lojtarët, të cilët janë boshti i Skënderbeut dhe më me eksperiencë së të rinjtë. Pas humbjes të së shtunës ndaj Tiranës, vetë presidenti Ardjan Takaj ka kërkuar reagimin e menjëhershëm që në takimin e radhës. Në ndeshjen e Kupës që do të luhet ditën e mërkurë në Devoll përballë ekipit vendas, korçarëve
u është vënë ultimatum reagimi në këtë takim, pasi kompeticioni i dytë në vend është një objektiv që bardhekuqtë e lakmojnë në këtë sezon. Kështu, Takaj ka bërë me dije se nuk duhet të shihet në fushë një ekip si ai i miqësores së humbur ndaj devollinjve, si një kusht për të filluar reagimin. Pas ndeshjes
me Devollin, ka vijuar më tej Takaj, do të jetë e domosdoshme që Skënderbeu të marrë nëntë pikë të plota në tri ndeshjet e radhës që ka për të luajtur, fillimisht me Teutën, më pas me Vllazninë dhe në fund me Luftëtarin. Nëntë pikë që do t’i shkonin përshtat edhe pozicionit në të cilin Skënderbeu kërkon që
të listohet në fund të këtij sezoni. Ky ka qenë paralajmërimi i parë i presidentit të Skënderbeut për ekipin e tij, që vjen nga dy humbje, për më tepër me një lojë të dobët si ajo ndaj Bylisit. Ultimatum, i cili është shoqëruar edhe me masë, nëse ekipi nuk reagon dhe nuk merr fitore në takimet e radhës.
Skënderbeu aktualisht është në mes të tabelës së klasifikimit, por në dy sfidat e fundit ka shënuar një gol dhe ka pësuar gjashtë të tjerë. Skuadra ka luajtur me hope, ndonëse ndaj Tiranës mund të kishte marrë një pikë, nëse mbrojtja do të ishte treguar më e vëmendshme në fund të lojës.