FSHF zmbrapset për dritat, ja vendimi
Njoftimi i institucionit, klubet kanë kohë deri në dhjetor për kolaudimin e kullave
Kampionati nisi dhe rregullisht, shumë prej ekipeve nisën që të zhvillojnë ndeshjet pasdite dhe në orët e mbrëmjes, e kësisoj nën efektin e prozhektorëve. Mirëpo, u desh vetëm një javë me këtë normalitet dhe pas së dytës, ndodhi një ndryshim rrënjësor. Problemet me kullat e ndriçimit në shumë stadiume të vendit, bënë që FSHF-ja të dilte me vendimin për të mos lejuar asnjë stadium, veçmas "Elbasan Arena"-s dhe "Loro Boriçit", që të zhvillojnë ndeshje me drita. Por, pas javës së gjashtë, institucioni i futbollit në vend e ka ndryshuar këtë vendim. "Panorama Sport" ka marrë zyrtarisht përgjigjen nga FSHFja, rreth vendimit që është dhënë së fundmi, referuar zhvillimit të ndeshjeve nën efektin e prozhektorëve. Gazeta ka mësuar ekskluzivisht se klubeve iu është dhënë afat deri në muajin dhjetor që të mund të sigurojnë certifikatën e kolaudimit të dritave. Kjo ka qenë një kërkesë e fundit e shtuar nga FSHF-ja, e cila i ka gjetur klubet të papërgatitura. Tanimë, vetë institucioni i futbollit është sprapsur dhe që nga kjo fundjavë, skuadrat kanë mundësinë që të luajnë edhe ndeshje me drita.
Çfarë nuk shkon?
Vendosja e standardeve është diçka e rëndësishme për futbollin dhe kampionatet tona. Mirëpo, është më se e drejtë që klubet të njoftohen në kohë dhe të kenë mjaftueshëm mundësi për të riparuar defektet apo për të plotësuar kriteret që FSHF-ja kërkon. Së dyti, ka një nonsens të madh referuar standardeve; institucioni i futbollit kërkon me të drejtë zbatimin e rregulloreve dhe standardeve nga të gjitha klubet, por në fakt çfarë ndodh? A i zbaton vetë FSHF-ja standardet që vendos? Rasti i dritave është një nga të shumtët me të cilat FSHF-ja ka vepruar me dy standarde, gjë e cila dëmton garën, dëmton seriozitetin e saj dhe mbi të gjitha nuk shërben aspak për rritjen e cilësisë.