Baze: Devolli simpatik, Lushnja gati për shkëputje

Sfida mes dy ekipeve kryesuese zhvillohet ditën e diel

Pasi janë kualifikuar në Kupë, duke fituar dy herë ndaj Orikut, lushnjarët janë të përqendruar te sfida me Devollin, ekipin që mban vendin e dytë, vetëm dy pikë më pak. Kjo ndeshje është shtyrë për ditën e diel. Verdhejeshilët vijojnë përgatitjet në një atmosferë pozitive, pasi i kanë fituar të gjitha takimet sezonale të luajtura deri më tani. Pesë ndeshje dhe pesë fitore. Për gazetën “Panorama Sport” flet mesfushori Okeljan Baze, i cili thekson: “Në ekip mbizotëron qetësia dhe optimizmi, që normalisht kanë ardhur pas tri fitoreve radhazi në kampionat dhe kualifikimit në Kupë. Kemi fituar me rivalët e drejtpërdrejtë, por asgjë nuk ka mbaruar, sepse aty-aty jemi me pikë. Nuk jemi të shkëputur dhe na pret ndeshja e radhës në Bilisht. Jemi të përqendruar te sfida me Devollin, një kundërshtar që ka kapur vendin e dytë. E vlerësojmë ndeshjen dhe kundërshtarin, sepse ka bërë shumë mirë deri tani. Kanë një ekip simpatik dhe një trajner me përvojë, ndaj duhet shumë kujdes. Grupin e kemi të plotë dhe kemi besim se do ta kalojmë me sukses edhe këtë ndeshje”, është shprehur mesfushori qendror i lushnjarëve, Baze.

PRECEDENTËT - Lushnja udhëton drejt Bilishtit pas 9 edicionesh. Për herë të fundit, Devolli dhe Lushnja janë përballur më 5 mars 2011. Edhe në atë kohë, lushnjarët drejtoheshin nga Ilir Gjyla dhe kanë humbur 3-2. Gjoni dhe Zharkalliu do të shënonin për verdhejeshilët, ndërsa Lamnica, Zylyftari dhe Nakamura për bilishtarët. Rezultati i fundit pozitiv i Lushnjës në Bilisht rezulton 10 vjet më parë. Më 31 tetor 2009, Devolli dhe Lushnja barazonin 1-1, me gola të Allamanit për bilishtarët dhe Klodian Arbrit për Lushnjën. Alban Alushi