Higuain vrapon me 31 km/h, Interi i Kontes është i paralajmëruar
"Pipita", i fundit që i dha 3 pikë Juves në "San Siro"
Gonzalo Higuain e kaloi mbrëmjen post-Champions pa gjumë, pak për faj të adrenalinës që e shoqëron pas çdo sfide në të cilën ai lë gjithmonë vulën, por edhe si rrjedhojë e klasikes argjentinase mes Boka Zhunjorsit dhe River Plejtit, me këta të fundit, skuadrën e tij të zemrës, e cila i dha një dopio kënaqësi, duke mundur rivalët historikë. Pa dyshim që "Pipita" do të ketë festuar nga divani i shtëpisë, njësoj siç bëri në "Allianz Stadium", pasi zhbllokoi ndeshjen kundër Leverkusenit, duke shijuar nga televizori atë duel të cilin 13 vite më parë e vuloste personalisht, me një dopietë madje, një dygolësh, i cili i hapi edhe dyert e futbollit europian dhe transferimin e tij te Reali i Madridit. Gjithsesi, një natë pa gjumë mund të falet pas 3 pikëve në Champions, ndonëse nga mëngjesi tjetër Higuain ka riprogramuar trurin dhe është fokusuar te ndeshja e të dielës, te transferta e "San Siros", një stadium i cili nuk i solli shumë fat, teksa në gjashtë muajt e parë të sezonit të kaluar, ai luajti aty me bluzën kuqezi mbi shpatulla.
Nëse sezoni i kaluar ishte i gjithi për t'u harruar, pas dopio aventurës me Milanin dhe Çelsin (fitoi Ligën e Europës, por jo si protagonist me anglezët), edhe kjo verë që lamë pas, nuk ishte aspak e lehtë për sulmuesin. Higuain nisi fazën përgatitore në Torino si një i padëshiruar, me drejtuesit e klubit juventin, të cilët bënë gjithçka për ta larguar, ndonëse lidhja e fortë me trajnerin Mauricio Sarri ishte aleati më i mirë që ta konfirmonte në Torino. Gjithsesi, me çfarë është parë në këto dy muaj të parë, duket se si vetë "Pipita", ashtu sikurse edhe Sarri kanë bërë mirë që kanë këmbëngulur për të vazhduar aventurën e tretë së bashku (pas Napolit dhe Çelsit, tashmë edhe te Juvja), sepse Higuain nga i padëshiruar, është rikthyer në lider dhe mbi të gjitha i ka dhënë një shkelm të gjithë atyre zërave që thoshin se mes tij dhe Ronaldos ekzistonte një luftë personale. Meritë të madhe për këtë rikthim në formë të Higuainit, i cili në ngjyrat bardhezi ka ndryshuar vetëm numrin (nga 9-ta te 21-shi), ka pa dyshim trajneri Sarri. Ky i fun
dit i dha menjëherë besim si titullar, pasi gjatë verës, argjentinasi pranoi t'i nënshtrohej një diete të rreptë ushqimore si dhe një stërvitjeje të personalizuar, të cilën e kishte nisur një muaj përpara se të startonte zyrtarisht faza përgatitore me Juven. Në të
njëjtën kohë, edhe babai i tij, Horge, një ish-futbollist, zbriti në "fushë" duke bërë rolin e psikologut për të birin, duke i rikthyer qetësinë dhe besimin në vetvete, këshilla që duket qartë se kanë dhënë efekt të menjëhershëm. Dhe fatmirësisht, frytet e këtyre kurave po i shijon jo vetëm "Pipita", por edhe Juventusi, siç tregoi dhe ndeshja e fundit me Bajer Leverkusenin.
Drejt Interit
Higuain e tregoi që në ditën e parë të grumbullimit se ishte ende i denjë për të luajtur me Juventusin, për të luajtur përkrah Ronaldos dhe për të shkëlqyer së bashku. Tifozët gjithashtu e motivuan edhe më shumë duke i thurur kore që të qëndronte dhe për sulmuesin nuk kishte sesi të niste më mirë ky vit i ri futbollistik. Aventura e dytë e Higuainit me Juventusin jo vetëm që po ecën në drejtimin e duhur, por garanton premisa edhe më të mëdha në vazhdim. Nëse golat janë dy (1 në Serinë A dhe 1 në Champions) në 7 prezenca, është forma fizike ajo që mahnit, duke qenë se ndaj Leverkusenit jo vetëm vrapoi 9 kilometra në fushë (shumë për një sulmues), por sprintet e shpeshta që ofron dhe kapja e një shpejtësie prej 31 kilometrash në orë me topin në këmbë janë sinjale që konfirmojnë formën e mirë të "Pipitas". Për momentin, Gonzalo e ka fituar edhe stafetën personale me Dibalën dhe në pritje të Interit, projektohet sërish si titullar. Fundja, Higuain di sesi ta trembë Interin. Për këtë mjafton të kujtosh faktin se fitoren e fundit që Juventusi e ka arritur në "San Siro", më 28 prill 2018, e vulosi pikërisht Higuaini, me përmbysje në minutën e 89-të, një gol që futi në kasafortë edhe titullin e shtatë radhazi të Juventusit në Serinë A. Ndaj me këtë kujtim të bukur dhe me këtë formë fantastike që po tregon, Gonzalo Higuain paralajmëron drejtpërdrejtë Interin e Antonio Kontes, skuadrën që kryeson (+2 pikë) aktualisht kampionatin, të paktën deri të dielën, sepse në rast fitoreje të Juventusit...