Lukaku rikthehet në stërvitje, Marota: Me Juven, sfidë titulli
Administratori: Sfida e së dielës do tregojë shumë
Romelu Lukaku po përgatitet për të qenë protagonist në Inter-Juventus. Ndërkohë që zikaltrit ishin të mërkurën në Barcelonë, sulmuesi belg ka qëndruar në qendrën stërvitore "Appiano Gentile" dhe ka zhvilluar një seancë të veçuar nga grupi, me synimin për t'u rikthyer i gatshëm të dielën. Në ambientet interiste filtron optimizëm për ta parë në fushë nga minuta e parë: dy ditët e terapisë, të cilave u është nënshtruar në vend që të udhëtonte me shokët e skuadrës në Spanjë, i kanë dhënë mundësinë ta lërë pas krahëve lodhjen në katërcepsin e këmbës së majtë.
FORMA
- Kushtet e tij fizike do mbahen gjithmonë nën kontroll gjatë ditëve të ardhshme, kur skuadra të stërvitet në "Appiano". Trajneri Antonio Konte do kishte dashur ta kishte në stol të mërkurën, por lojtari, i cili nuk ndihej në formë optimale, preferoi të mos rrezikonte. Do duhet thuajse patjetër të jetë në fushë kundër "Zonjës", ku do të mungojë i skualifikuari, Aleksis Sançez. Handanoviç me shokë në orët e para të ditës së djeshme janë rikthyer në Itali dhe kaluan natën në qendrën stërvitore. Ditën e djeshme zbritën në fushë për seancën e parë në prag të "derbit të Italisë". Pjesa e skuadrës që u aktivizua kundër Barcelonës zhvilloi një seancë shkarkimi, ndërsa nga pjesa tjetër u ndoq një regjim më intensiv. Vështirë që ish-sulmuesi i Junajtidit t'i bashkohet menjëherë skuadrës. Sot do të kuptohet më shumë.
ADMINISTRATORI
Ndërkohë, i intervistuar nga mediat italiane, ish-administratori
i deleguar i Juves (sot në të njëjtin rol tek Interi) Xhuzepe Marota, ka analizuar edhe supersfidën e javës së shtatë të Serisë A. Një ndeshje e veçantë për të po ashtu edhe për trajnerin Konte, edhe ky i fundit me një të kaluar në Torino.
"Bëhet fjalë për një ndeshje të madhe, si ajo kundër Barcelonës; ajo e së dielës është një sfidë ku mund të tregohet shumë për favoritin e titullit. Gjithashtu, përtej rezultatit, do shihet edhe paraqitja kundër një skuadre të fortë".