Grizman-Mesi nuk flasin jashtë fushe, por as në fushë
“Pleshti”: Nuk kam asnjë problem me sulmuesin
Karriera e Antuan Grizmanit te Barça është ende në tako. Sulmuesi francez nuk ka arritur ende që të shkëlqejë pas transferimit nga Atletiko në verë. Ai është larg formës që jemi mësuar ta shohim në Madrid dhe as shokët e rinj të skuadrës nuk po e ndihmojnë që të ambientohet shpejt. Grizman kërkon shpesh të luajë me shokët e tij me një pasim, sakrifikon veten në mbrojtje dhe heq dorë nga disa prej pikave të tij më të forta për t’u përshtatur me stilin e Barçës. Përveç përshtypjeve të mira që la në ndeshjen me Betisin, asgjë tjetër. Ndaj Interit ishte ndeshja e radhës ku ai zhgënjeu. Dhe është bashkëpunimi i tij me Mesin një nga problemet kryesore që duhet zgjidhur. “Nuk kam asnjë problem me Grizmanin. Kemi një marrëdhënie të mirë si me këdo. Jemi të bashkuar”, tha Mesi pas përmbysjes ndaj Interit. Por Grizman e ka pranuar publikisht se komunikimi i tyre është i kufizuar. Dhe i kufizuar komunikimi është edhe në fushë dhe këtë e konfirmojnë statistikat. Në dy ndeshjet e deritashme në Champions të Barcelonës, francezi i ka dhënë vetëm 4 pasime argjentinasit (dy për ndeshje). Ndërsa Mesi i ka pasuar 5 herë (dy ndaj Dortmundit dhe 3 ndaj Interit). Duke qenë se ata luajnë në krahë të kundërta, shpesh kjo është normale,
ashtu siç është edhe fakti se kapiteni i katalanasve luajti vetëm diçka më shumë se 30 minuta në ndeshjen e parë ndaj Dortmundit. Por ka një kundërshembull. Komunikimi në fushë mes Mesit dhe Dembelesë për shembull. Francezi luajti më pak se gjysmë ore në pjesën e dytë ndaj Interit, por ai mori 5 pasime nga
Mesi, pra 5 pasime në 28 minuta krahasuar me 5 në 97 minuta me Grizmanin, që luan në të njëjtin pozicion. Edhe harta e shkeljes së fushës tregon problemet mes Grizmanit dhe Mesit. Ndaj Dortmundit, Grizmani i dha Mesit 2 pasime në 34 minutat që luajtën së bashku, po aq sa me Ansu Fatin kur talenti hyri në
fushë. Kjo është e pamjaftueshme për një sulmues për të cilin u paguan 120 mln euro në verë. Trioja e sulmit Grizman, Suarez, Mesi që tifozët e Barcelonës ëndërronin në fillim të sezonit nuk ka treguar ende se funksionon. Edhe sa kohë do t’i duhet MSG-së që të tregojnë se nuk është një kombinim i keq?