Myler e Martinez, Bajerni nervoz për "Oktoberfest"
Myler nuk e pret mirë stolin, Martinez shpërthen në lot
Bajerni buzëqesh i sforcuar dhe pi për të harruar zhgënjimin e humbjes së fundit kundër Hofenhaimit. Të shtunën, kampionët pësuan disfatën e parë në Bundesligë këtë sezon, 1-2 në "Allianz Arena", vetëm një ditë përpara vizitës zyrtare në "Oktoberfest". Ashtu si sezonin e shkuar, pas humbjes 0-3 me Gladbahun, trajneri Niko Kovaç dhe lojtarët e tij festuan me veshjet karakteristike festën tradicionale të Gjermanisë. Por bavarezët u treguan profesionistë. Përpara flesheve të aparateve dhe kamerave ata buzëqeshën, edhe pse dukej se humori nuk ishte 100%. Pak pas orës 13:00, autobusi i skuadrës mbërriti në tendën e festës. Shefi i bordit, Karl-Hainc Rumenige, ishte i pari që hyri atje. Menjëherë pas drejtuesit, hyri Tomas Myler. Sulmuesi i Bajernit ndaj Hofenhaimit u ul për herë të pestë radhazi në stol dhe kishte të gjithë të drejtën për të mos e shijuar në maksimum festën dhe për të qenë i zhgënjyer. Megjithatë, as 30-vjeçari nuk ngurroi të buzëqeshte përpara kamerave. I pyetur pas Hofenhaimit nga gazetarët për të dhënë një koment nëse ishte i zhgënjyer nga stoli, Myler nuk preferoi të bënte polemika:
"Nuk kam asgjë për të thënë, asgjë". Shumë prej yjeve të skuadrës, si Robert Levandovski, Filipe Kutinjo apo Joshua Kimish erdhën me familjet e tyre.
MARTINEZ
- Një tjetër fytyrë e pakënaqur pas humbjes me Hofenhaimin ishte edhe
Havi Martinez. Mesfushori spanjoll u pa në stol të përlotej që nuk luajti dhe pranë tij shkoi zv.trajneri Hans Flik për ta ngushëlluar. Flik sqaroi edhe arsyen përse ishte kaq i zhgënjyer heroi i tripletës në 2013ën: "Nuk ka lidhje me faktin se nuk u mor në konsideratë nga
trajneri Kovaç. Arsyet e dhëna nga mediat janë krejtësisht të pavërteta". Sipas Flikut, Martinez kishte familjen e tij të ftuar në tribunë të shtunën, në ditën që djali i tij Lukas festoi 3-vjetorin dhe ai do të kishte preferuar ta shikonte babanë në fushë.