Hygor dhe Lika: Fitorja nuk ishte rastësi, por taktikë e trajnerit
Hygor Guimaraesh dhe Gilman Lika janë “heronjtë” e Vllazninë. Falë golave të tyre, shkodranët janë të 2-ët me 12 pikë. Braziliani u shpreh i lumtur për rrjetën e shënuar, e cila është e treta për këtë sezon. Numri “8” i shkodranëve mendon se skuadra është në ritmin e duhur, e megjithatë tregohet i matur kur pyetet për pretendime madhore. “Kemi një skuadër të mirë, të ndërthurur me lojtarë me eksperiencë dhe të rinj në moshë. Mendoj se mund të bëjmë mirë këtë sezon, me atë që kemi treguar deri më tani. Normalisht jam shumë i kënaqur për golin, kënaqësi e madhe të shënosh. Të bësh tre gola në 7 ndeshje, normalisht jam i lumtur. Golin ia dedikoj djalit tim”, u shpreh fillimisht Hygor për “Panorama Sport”. Në lidhje me bashkëkryesimin dhe sfidën e radhës, mesfushori pohoi: “Vendi i parë? Në fakt, tani ka startuar kampionati dhe ka shumë ndeshje akoma. Hap pas hapi, fillimisht kemi Partizanin, pastaj të shohim me radhë”.
KAPITENI – Gilman Lika vazhdon të dëshmojë se është një “ujk” kur vjen fjala për gola. Me atë goditje vrastare i dha një trepikësh të madh Vllaznisë së tij. Për mediat, ai u shpreh i lumtur për fitoren, ndërkohë që nuk i tremben asnjë ekipi. “Goli në ato minuta ishte i rëndësishëm për ne. E kemi deklaruar edhe më parë që ekipi ka pasur pak mungesë fizike prej fazës përgatitore, por me kalimin e ndeshjeve çdo gjë ka ardhur duke u përmirësuar. Kjo fitore me Kukësin nuk ishte krejtësisht e papritur. Taktika e trajnerit duke shfrytëzuar kundërsulmin ishte çelësi dhe besoj se i zbatuam në maksimum detyrat e tij”, u shpreh fillimisht kapiteni. Në lidhje me objektivat dhe ndeshjen e radhës, Lika pohoi. “Të jemi realistë, pavarësisht vendit të parë, nuk është se objektivi ynë është të dalim kampionë. Por, ne kemi një grup të mirë që nuk i frikësohemi asnjë ekipi. Thjesht duhet të jemi të qetë në fushë dhe të japim gjithsecili maksimumin. Lider? Këtë nuk shkon ta them unë. Ata që shohin nga jashtë, e dallojnë më mirë se cili është lideri. Partizani? Thjesht një ndeshje e radhës, është në Shkodër dhe do ta përgatisim për ta fituar”, përfundoi Gilman Lika.