Duro: Na goditën në momentin më të mirë, gabuan mbrojtësit

Kukësi u mposht nga Vllaznia dhe Shpëtim Duro u shfaq më shumë se i zhgënjyer. Në prononcimin pas ndeshjes për mikrofonin e “SuperSport”, trajneri i verilindorëve evidentoi gabimet. “Futbolli është i tillë. Do vlerësim në çdo komponent. Jam i zhgënjyer. Kishim punuar për të qenë të kujdesshëm. Do luanim ndaj një skuadre që do ishte e vendosur mirë. Na ndëshkuan në momentin tonë më të mirë. Me lojën që po zhvillonte skuadra, kisha bindjen se ishte diçka shumë e lehtë për t’u përfunduar. Ishim vendosur shumë keq, na goditën. Paaftësia e mbrojtjes sonë, pasi duhet të bënim faull taktik. Nuk rezultoi ashtu. Na goditën dhe fituan ndeshjen. Vllaznia kishte zgjedhur taktikën e saj. Në pjesën e dytë filluam ta qarkullonim topin më shpejt. Kur një skuadër mbrohet me shumë forca, është e vështirë të krijojë superioritet. Kishim shumë momente pozitive. E vështirë kur një skuadër mbron me shumë forca, të krijosh situata shënimi. U goditëm në momentin më të mirë, kur skuadra mund të shënonte golin e dytë. Kotobelli duhet të bënte faull taktik te goli i dytë. Çdo humbje të krijon probleme psikologjike. Akoma më shumë kur humbet në situata të tilla. Çunat janë shumë të mërzitur. Kemi zhvilluar ndeshje të mira dhe me kundërshtarë shumë të mirë. Humbjet na krijojnë probleme. Na gëzon fakti që jemi në objektiva. Janë shumë skuadra me 1-2 pikë. Gara është e hapur. Objektivat i kemi para. Nuk ka përgjegjësi portieri Xhika te goli i dytë. Në qoftë se do e shpëtonte, do ishte merita e tij. Përgjegjësia ishte e skuadrës që nuk duhet të lejonte sulmin e Vllaznisë”, përfundoi Duro.