Gjermania kundër Argjentinës, Lëv: Testoj të rinjtë

"Kemi shumë mungesa, nuk më intereson rezultati"

Sot në orën 20:45 ko mbëtarja gjermane do të zbresë në fushë ndaj Argjentinës në "Signal Iduna Park" të Dortmundit. Trajneri i "pancerave" u shpreh në konferencën për shtyp se ndeshja ndaj bardhekaltërve është një test i mirë përpara sfidës në Talin ndaj Estonisë.

Si do të rreshtohet skuadra ndaj Argjentinës, nisur nga mungesat e shumta?

Situata nuk është optimale, ndaj kam thirrur në skuadër Koh dhe Rudi, të dy lojtarët do të jenë të gatshëm për ndeshjen e nesërme (sot). Verner pritet të vijë ditën e ndeshjes, gjendja gripale është përmirësuar. Ai së bashku me Tah do të jenë në gatshëm për ndeshjen me Estoninë, ajo na intereson më shumë. Gyndoan nuk do të luajë për shkak të një dëmtimi muskulor. Shpresojmë që ai të rikuperohet në ditët në vazhdim. Rojs ka një dhimbje në gju dhe gjithashtu nuk është planifikuar në sfidën e nesërme (sot).

Ju shqetëson kjo gjendje?

Është një situatë jo e këndshme. Kemi pasur shumë lojtarë të dëmtuar që nuk mund të luajnë me skuadrën. Pres nga lojtarët që do të luajnë në ndeshjen ndaj Argjentinës të tregojnë aftësitë e tyre. Momenti më i mirë për ta.

Sa do të ndikojë në lojë?

Jemi në një fazë delikate për sa i përket rritjes së skuadrës. Kombëtarja nuk funksionon si klub. Kemi shumë pak mundësi për t'u stërvitur me njëri-tjetrin dhe për të vënë në zbatim idetë tona të lojës. Skuadra po bënte mirë, por tani ajo është përgjysmuar dhe kjo nuk është diçka e lehtë për t'u rregulluar. Në nëntor do të kemi ndeshje të tjera të cilat shpresoj t'i luajmë me një skuadër të kompletuar.

Çfarë prisni nga Rudi?

Sebastian ka zhvilluar ndeshje të plota te Hofenhaimi. Ai gëzon një formë të mirë dhe kjo më intereson më shumë. Eksperienca e tij do të na ndihmojë për të ruajtur ekuilibrat në mesin e fushës dhe kjo është e rëndësishme në një skuadër të re.

Po Koh?

Robin luan në disa pozicione në repartin e mbrojtjes. Por ai di të pozicionohet edhe në mesfushë si numër 6. Forma e tij është në rritje, këtë e kam vënë re në ndeshjet e luajtura me Fraiburgun.

Çfarë kujtimesh ju ngjall Argjentina?

Në Botërorin e 2006-ës ishte një ndeshje shumë emocionuese duke fituar në fund me penallti. Kurse në 2014ën bëmë gjithashtu një ndeshje të mirë dhe në fund u shpallëm kampionë bote.

Sa e vështirë është të jesh një lojtar profesionist?

Sa më shumë të fitosh, aq më shumë rritet presioni te lojtarët. Pritshmëria është e madhe në kompeticone të rëndësishme. Duhet bërë shumë kujdes pasi lojtarët performojnë gjithmonë në limitet e tyre. Njerëzit që marrin këto vendime të

rëndësishme duhet të bëjnë kujdes në të ardhmen pasi po luajnë me shëndetin e lojtarëve.

Vazhdoni t'i besoni Nojerit në portë, apo ka ndryshime?

E kam thënë edhe para disa ditësh, Manuel është portieri i parë. Nuk ka pasur asnjëherë probleme midis dy portierëve. Respekti ka dominuar gjithmonë. Futbolli është një garë dhe varet gjithmonë nga performancat, e kam pasur të vështirë të zgjedh pasi ashtu si Manuel edhe Andre luajnë në nivele të larta.