Seferi: Shqipërinë e gjeta super dhe me optimizëm, vetëm për fitore
Patrioti nga Kumanova: I befasuar nga pritja që m'u bë
Maqedonia e ka lutur prej muajsh që të bëhet pjesë e skuadrës së parë të saj, por djaloshi nga Kumanova ka refuzuar dhe me bindje e ka deklaruar gjithmonë: "Jam krenar që jam shqiptar. Do të pres Kombëtaren e Shqipërisë". Ftesa i erdhi dhe i gjendur brenda kuqezinjve në grumbullimin e parë, Taulant Seferi flet për optimizmin që ka gjetur në grupin e futbollistëve si dhe duke deklaruar se janë mundësitë për të fituar në Turqi, falë futbollistëve më në formë që ka afruar trajneri Reja. Seferi gjatë konferencës së djeshme ka shprehur gatishmërinë për të luajtur në çdo rol, duke përmendur se në Zvicër luan qendërsulmues.
Si ju është dukur Kombëtarja nga jashtë dhe çfarë ndryshimi vini re tani që jeni pjesë e saj?
Kombëtarja më duket shumë mirë. Unë e kam ndjekur gjithmonë Kombëtaren dhe në këto dy ditë që jam pjesë e saj, jam shumë, shumë i befasuar, sepse çunat më kanë pritur shumë mirë. Jam vërtet shumë i kënaqur dhe po shoh pozitivitet këtu në grumbullim dhe shpresoj që këtë atmosferë të mirë ta shfaqim edhe në ndeshjet e ardhshme.
E keni pritur gjatë këtë ftesë nga Kombëtarja, por a është ky momenti juaj më i mirë i mundshëm?
Është normale që të pres një ftesë nga Kombëtarja, sepse kam dëshirë që të jem gjithmonë pjesë e saj. Mendoj se jam mirë dhe shpresoj që të bëj më të mirën me përfaqësuesen.
A prisni që të merrni minuta ndaj Turqisë ose të paktën në Moldavi?
E rëndësishmja është që jam shumë mirë dhe nëse do të marr apo jo minuta, atë e vendos trajneri. Unë do të jap maksimumin tim si në stërvitje e po ashtu do të jem i gatshëm edhe për ndeshje.
Si është forma juaj aktuale? Në dy ndeshjet e fundit nuk kam luajtur si titullar pasi kam pasur një dëmtim të vogël, por tani ndihem shumë mirë dhe s'kam asnjë problem.
A është Shqipëria e aftë për të marrë pikë në këto dy ndeshje? Trajneri ka marrë ata lojtarë që janë në formën e tyre më të mirë dhe normalisht që këto dy ndeshje janë shumë të rëndësishme për ne. Fokusi ynë do të jetë vetëm që të triumfojmë në këtë përballje dhe me patjetër na duhet fitore ndaj Turqisë. Unë po shoh që Kombëtarja është në formë shumë të mirë, ka një ambient shumë pozitiv këtu brenda dhe jemi një grup shumë i mirë. Lojtarët anësorë kanë vuajtur me skemën 3-5-2. Ju personalisht a e gjeni veten në një rreshtim të tillë?
Realisht nuk kemi bërë shumë taktikë në dy stërvitjet e para, por unë nuk jam duke luajtur në krah me ekipin tim. Po luaj si qendërsulmues. Megjithatë, besoj se nuk e kam problem që të luaj në skemën 3-5-2 edhe si anësor. Kudo që të ketë nevojë trajneri, jam i gatshëm që të bëj maksimumin.